- పెండింగ్ పనులు పూర్తి చేయాలని ఆదేశం
ఆదిలాబాద్, వెలుగు: ఆదిలాబాద్ మున్సిపాలిటీ పరిధిలో జరుగుతున్న పనుల్లో నిర్లక్ష్యంపై ఎమ్మెల్యే పాయల్ శంకర్ ఆగ్రహం వ్యక్తం చేశారు. మంగళవారం మున్సిపల్ అధికారులతో కలెక్టరేట్ లో సమీక్ష సమావేశం నిర్వహించారు. ఈ సందర్భంగా ఎమ్మెల్యే మాట్లాడుతూ.. కేఆర్కే కాలనీలో మంజూరైన రోడ్లు, మురికి కాలువల పనులు ఇంతవరకు ఎందుకు పూర్తి కాలేదని అధికారులను ప్రశ్నించారు.
గత ప్రభుత్వం ప్రతిష్టాత్మకంగా చేపట్టిన మిషన్ భగీరథ నల్లాలు ఇంతవరకు ఎందుకు ఇవ్వలేదో చెప్పాలన్నారు. ఆదిలాబాద్లోని ప్రధాన వీధుల్లో రోడ్లను ఆక్రమించుకొని వందల సంఖ్యలో తోపుడు బండ్లు ఉన్నాయని, కేవలం 300 మీటర్ల మార్గం దాటలంటే 20 నిమిషాల సమయం పడుతోందన్నారు. ఆ మార్గం గుండా నడవాలంటేనే మహిళలు భయపడే పరిస్థితి ఉందన్నారు.
రోడ్లపై ఆక్రమణలు ఉండకుండా, ప్రజలకు ఇబ్బంది లేకుండా షెడ్లు నిర్మించినా ఫుట్ పాత్ వ్యాపారులను ఎందుకు షిఫ్ట్ చేయడంలేదని ఫైర్ అయ్యారు. ఏరోడ్రమ్ పక్కన ఉన్న అక్రమ గోవధ శాలను తొలగించాలని, పెండింగ్లో ఉన్న కార్మికుల వేతనాలను వెంటనే చెల్లించాలని ఆదేశించారు. మున్సిపాలిటీలో ఉన్న ఖాళీలను వెంటనే భర్తీ చేసేలా కృషి చేస్తామన్నారు. మున్సిపల్ కమిషనర్ శైలజ, ఆ శాఖ అధికారులు పాల్గొన్నారు.
