కేటీఆర్ సిగ్గుపడాలె.. మీ కుటుంబ ధనదాహం వల్లే మేడిగడ్డ కుంగింది: ఎమ్మెల్యే వివేక్

కమీషన్ల కోసమే కాళేశ్వరం ప్రాజెక్టు కట్టిన్రు
లక్ష కోట్లు ఖర్చు పెట్టి 90 వేల ఎకరాలకే నీళ్లిచ్చిన్రు
చెన్నూరులో పలు అభివృద్ధి పనులకు శంకుస్థాపన

మంచిర్యాల/జైపూర్, వెలుగు: కాళేశ్వరం ప్రాజెక్టు పేరిట రూ.లక్ష కోట్లు దోచుకొని.. మేడిగడ్డ సందర్శనకు వెళ్లిన కేటీఆర్ సిగ్గుపడాలని చెన్నూరు ఎమ్మెల్యే వివేక్ వెంకటస్వామి విమర్శించారు. కేసీఆర్ కుటుంబ ధనదాహం వల్లే మేడిగడ్డ బ్యారేజీ కుంగిందని, అన్నారం బ్యారేజీకి బుంగలు పడ్డాయన్నారు. వారి పర్యటన ప్రజల సొమ్మును ఎట్ల దోచుకున్నారో చూడడానికి వెళ్లినట్టు ఉందని ఫైర్అయ్యారు. ప్రజాధనాన్ని దుర్వినియోగం చేసి, రాష్ట్ర ఆర్థిక పరిస్థితిని చిన్నాభిన్నం చేసినందుకు తెలంగాణ ప్రజలకు క్షమాపణ చెప్పాలని డిమాండ్ చేశారు.

శుక్రవారం మంచిర్యాల జిల్లా చెన్నూర్ నియోజకవర్గంలో వివేక్ పర్యటించారు. జైపూర్ మండలం ఇందారంలో రూ.20 లక్షలతో హెల్త్ సబ్ సెంటర్ నిర్మాణానికి, కాసింపల్లిలో సీసీ రోడ్డు నిర్మాణానికి శంకుస్థాపన చేశారు. అనంతరం మందమర్రి ప్రెస్క్లబ్లో మీడియాతో మాట్లాడారు. 'కేసీఆర్ రూ.35 వేల కోట్లతో పూర్తయ్యే ప్రాణహిత ప్రాజెక్టును పక్కనపెట్టిండు.

కమీషన్ల కోసమే కాళేశ్వరం ప్రాజెక్టు కట్టిండు. ఆంధ్రా కాంట్రాక్టర్లను ప్రపంచంలోనే ధనికులను చేసిండు. ఐదేండ్లలో 940 టీఎంసీలు లిఫ్ట్ చేసి.. 17 లక్షల ఎకరాలకు నీళ్లివ్వాల్సి ఉండె. కానీ, కేవలం 168 టీఎంసీలు లిఫ్ట్ చేసి మళ్లా గోదావరిలోకి వదిలిపెట్టిన్రు. 90 వేల ఎకరాలకు మాత్రమే నీళ్లిచ్చిన్రు' అని వివేక్ విమర్శించారు. కాళేశ్వరం పేరిట లక్ష కోట్ల అప్పు చేసి.. ప్రజల నెత్తిన రూ.50వేల కోట్ల వడ్డీ భారం మోపారన్నారు. బ్యారేజీల బ్యాక్ వాటర్తో చెన్నూర్, మంథని నియోజకవర్గాల్లో వేల ఎకరాల్లో పంటలు నష్టపోతున్న రైతులను నాటి ప్రభుత్వం ఆదుకోలేదని మండిపడ్డారు.

భగీరథ, ధరణిలోనూ స్కాములే..

కేసీఆర్ పాలనలో కాళేశ్వరం, మిషన్ భగీరథ, ధరణి పోర్టల్ అన్నింట్లో స్కాములు చేశారని వివేక్ అన్నారు. ‘మిషన్ భగీరథలో రూ.40 వేల కోట్లు తిన్నరు. పాత ట్యాంకులకు రంగులేసి, పాత పైపులకే కనెక్షన్లు ఇచ్చి అవినీతికి పాల్పడ్డరు.

గ్రామాల్లో నీళ్లు రాక ప్రజలు గోసపడుతున్నరు’ అని మండిపడ్డారు. ‘ధరణి పోర్టల్ తీసుకొచ్చి హైదరాబాద్ చుట్టుపక్కల 20 వేల ఎకరాల భూములు కబ్జా పెట్టిన్రు. రూ.15 లక్షల కోట్ల కుంభకోణం చేసిన్రు’ అని ఆరోపించారు. ఈ స్కాములపై సీబీఐ, ఈడీ ఎంక్వైరీ జరిపి.. కేసీఆర్ కుటుంబీకులు దోచుకున్న పైసలు కక్కించాలని సీఎం రేవంత్ రెడ్డిని కోరినట్టు వివేక్ చెప్పారు.