తెలంగాణలో 80వ దశకంలో పీపుల్స్ వార్ ప్రభావం ఎంతగా ఉందో ఈ ఘటన ఒక ఉదాహరణ. కుటుంబాలకు కుటుంబాలే.. పిల్లాపాపలను తీసుకుని అడవుల్లోకి వెళ్లిపోవడమంటే ఆలోచింపజేసే అంశం. జగిత్యాల జిల్లాలో జరిగిన అలాంటి ఘటన ఇది. ఆ కుటుంబంలో నుంచి అందరూ లొంగిపోయినా.. పది పన్నెండేళ్ల వయసులో అడవుల్లోకి వెళ్లిన వ్యక్తి.. చివరిగా దాదాపు 40 ఏళ్లకు లొంగిపోవడంతో ఈ ఘటన వెలుగులోకి వచ్చింది.
వివరాల్లోకి వెళ్తే.. మహారాష్ట్ర-మధ్య ప్రదేశ్-ఛత్తీస్గడ్ స్పెషల్ జోనల్ కమిటీ ప్రతినిధి ఆనంత్ అలియాస్ వికాస్ ఎల్ ఎస్ నవజ్యోత్ అలియాస్ మేకల వినోద్.. 2025 నవంబర్ 28వ తేదీన మహారాష్ట్ర పోలీసుల ఎదుట లొంగిపోయాడు. అనంత్ స్వస్థలం జగిత్యాల జిల్లా కథలాపూర్ మండలం చింతకుంట.
తల్లి ఆనంద భాష్పాలు:
తమ కొడుకు 1986లో తమతో పాటు పీపుల్స్ వార్ ఉద్యమంలో అడవుల్లోకి వచ్చాడని చెబుతోంది అనంత్ తల్లి. అప్పుడు అతనికి పది, పన్నెండేళ్లు అని.. ఆ వయసులో అడవుల్లోకి వచ్చిన అతడు.. ఆ తర్వాత తాము లొంగిపోయినా అడవుల్లోనే ఉండిపోయినట్లు తెలిపారు. ఎట్టకేలకు తన కొడుకు లొంగిపోవడంతో అనంత్ తల్లి మేకల గంగాలక్ష్మి ఆనందం వ్యక్తం చేశారు.
నలుగురు పిల్లలతో అజ్ఞాతంలోకి..
అనంత్ చింతకుంట గ్రామానికి చెందిన మేకల సాయిలు, - గంగ లక్ష్మి దంపతుల కుమారుడు. అనంత్ తల్లిదండ్రులు కూడా మావోయిస్టులే. తమ నలుగురు పిల్లలతో కలిసి 1986లో పీపుల్స్ వార్ లో చేరారు సాయిలు- గంగలక్ష్మి దంపతులు. ఆ తర్వాత అజ్ఞాతంలోకి వెళ్లిపోయారు. కొంతకాలానికి తన ఇద్దరు కూతుర్లు, చిన్న కొడుకుతో పోలీస్ ల ఎదుట లొంగిపోయారు మేకల సాయిలు, -గంగా లక్ష్మి దంపతులు.
తన కుటుంబ సభ్యులు జనజీవన స్రవంతిలో కలిసి పోయినా.. పెద్ద కొడుకు అనంత్ అజ్ఞాతంలోనే ఉండిపోయాడు. ఉద్యమంలో కీలక నేతగా ఎదిగాడు. ఇన్నాళ్లకు అనంత్ లొంగిపోవడంతో ఆనందం వ్యక్తం చేసింది అతని తల్లి. తన కొడుకుతో పాటు కుటుంబ సభ్యుల ఫోటోలు చూపిస్తూ సంతోషపడింది. తమ పిల్లల చిన్ననాటి ఫోటోలు చూపిస్తూ ముచ్చటపడిపోయింది.
వేధింపులు భరించలేకే పిల్లలతో కలిసి అడవుల్లోకి:
ఈ సందర్భంగా తమ కుటుంబంలో మొదట తన భర్త మావోయిస్టుల్లో చేరినట్లు గంగాలక్ష్మి తెలిపారు. భర్త అజ్ఞాతంలో ఉన్న సమయంలో పోలీసుల వేధింపులు భరించలేక తాను కూడా నలుగురు పిల్లలతో కలిసి ఆ రోజు అజ్ఞాతంలోకి వెళ్ళానని తెలిపారు. తమ పిల్లలు చిన్నతనం నుండే అజ్ఞాతంలో ఉండి పెరిగారని, తన పెద్ద కొడుకు అక్కడే ఉండిపోగా.. మిగతా వారిని తీసుకొని లొంగిపోయినట్లు గంగ లక్ష్మీ వెల్లడించారు. ఆ తర్వాత తన భర్త సాయిలు మరణించాడని తెలిపారు. పెద్ద కొడుకు లొంగిపోవడం సంతోషంగా ఉందని తెలిపారు.
