- సెక్యూరిటీ గార్డుల దగ్గర ఆరేండ్ల బాలుడు
- గాంధీ దవాఖానలో దయనీయ ఉదంతం
పద్మారావునగర్, వెలుగు : హైదరాబాద్ గాంధీ దవాఖానలో ఓ తల్లి అత్యవసర పరిస్థితిలో ఐసీయూలో చికిత్స పొందుతుండగా..తండ్రి చెప్పాపెట్టకుండా వెళ్లిపోయాడు. దీంతో వారి ఆరేండ్ల కొడుకు నాన్న ఎటుపోయాడో తెలియక...తల్లికి ఏమైందో అర్థం కాక ఏడుస్తున్నాడు. ఈనెల1న నిజామాబాద్లోని సలూర క్యాంప్కు చెందిన మాధవి (30)ని రెండో కాన్పు కోసం ఆమె భర్త గంగాధర్ గాంధీ దవాఖానకు తీసుకువచ్చి అడ్మిట్చేశాడు. వీరితో పాటు ఆరేండ్ల కొడుకు సాత్విక్(6)ను కూడా తీసుకువచ్చారు. డెలివరీ సందర్భంగా పుట్టిన శిశువు చనిపోగా..మాధవి అపస్మారక స్థితిలోకి వెళ్లింది.
దీంతో ఆమెను ఎంఐసీయూ (మెటర్నిటీ ఇంటెన్సివ్ కేర్ యూనిట్) లోకి మార్చారు. మంగళవారం అర్ధరాత్రి సాత్విక్ దవాఖానలో ఒంటరిగా తిరుగుతుండగా సెక్యూరిటీ సిబ్బంది గమనించి గార్డు రూమ్కు తీసుకొచ్చారు. బాలుడు వివరాలు సరిగ్గా చెప్పకవడంతో ఫ్యామిలీ మెంబర్స్ గురించి వెతికారు. చివరకు గంగాధర్ తన కొడుకును, భార్యను విడిచిపెట్టి వెళ్లినట్టు తెలిసింది. సాత్విక్ను తల్లి దగ్గరకు తీసుకువెళ్తే అపస్మారక స్థితిలో ఉండడంతో ఆమె గుర్తు పట్టడం లేదు. దీంతో మూడు రోజులుగా సెక్యూరిటీ క్యాబిన్లో ఆశ్రయం కల్పించి టిఫిన్, భోజనం పెడుతున్నామని సెక్యూరిటీ చీఫ్ శివాజీ తెలిపారు. బాలుడి తల్లికి కూడా దవాఖాన పేషంట్ కేర్ సిబ్బంది సపర్యలు చేస్తున్నారు.
