ఆదిలాబాద్ టౌన్, వెలుగు: రాబోయే ఎన్నికల్లో బీఆర్ఎస్కు గుణపాఠం చెప్పి పార్లమెంట్ పరిధిలోని ఏడు అసెంబ్లీ స్థానాల్లో బీజేపీ జెండా ఎగురవేస్తామని ఎంపీ సోయం బాపూరావు ధీమా వ్యక్తం చేశారు. పట్టణంలోని ఓ ఫంక్షన్ హాల్లో ఆదివారం నియోజకవర్గ పార్టీ కార్యకర్తలు, ముఖ్య నాయకుల సమావేశం నిర్వహించారు. ఆయన మాట్లాడుతూ ప్రతి కార్యకర్త పార్టీ కోసం కష్టపడాలని సూచించారు. కేసీఆర్అవినీతిని, మోసపూరిత వాగ్ధానాలు, అక్రమాలను ప్రజల్లోకి తీసుకువెళ్లాలన్నారు.
సాధారణ ఆదివాసీ బిడ్డను ఢిల్లీ వరకు తీసుకెళ్లి ఉన్నత స్థానం కల్పించిన బీజేపీని తాము ఎన్నటికీ వదిలిపెట్టేది లేదన్నారు. పార్టీ జిల్లా అధ్యక్షుడు పాయల్ శంకర్మాట్లాడుతూ.. బీఆర్ఎస్, కాంగ్రెస్ నాయకులు ఆదిలాబాద్ లో బీజేపీ అధికారంలోకి వస్తుందని తట్టుకోలేక అనేక కార్యక్రమాలకు శ్రీకారం చుడుతున్నారని ఎద్దేవా చేశారు. జడ్పీ మాజీ చైర్పర్సన్ సుహాసినీరెడ్డి, నాయకులు బోయర్ విజయ్, మయూర్ చంద్ర, నగేశ్, ఆదినాథ్ తదితరులు పాల్గొన్నారు.
