భీమన్న గుట్టను కాపాడాలి..‘సేవ్ భీమన్నగుట్ట’ పేరుతో ముదిరాజ్ ల ఆందోళన

• ఆర్డీవో కార్యాలయం ముందు రిలే నిరాహార దీక్షలు

నిర్మల్, వెలుగు: నిర్మల్ పట్టణానికి ఆనుకొని ఉన్న భీమన్న గుట్టను కాపాడాలంటూ ముదిరాజ్ కులస్తులు చేస్తున్న ఆందోళన తీవ్రమైంది. భీమన్న గుట్టను కాపాడాలంటూ గత కొద్ది రోజులుగా వారు  వరుస ఆందోళనలు చేస్తున్నారు. ఇదిలాఉండగా శనివారం నుంచి ‘సేవ్ భీమన్న గుట్ట’ పేరుతో స్థానిక ఆర్డీవో కార్యాలయం ముందు రిలే నిరాహార దీక్షలను ప్రారంభించారు. దాదాపు 200 మందికి పైగా ముదిరాజ్ కులస్తులు పాల్గొన్నారు. 

ఈ సందర్భంగా నేతలు యాటకరి సాయన్న, సుంకరి సాయి, సుంకరి నందు, పాతర్ల గణేశ్ తదితరులు మాట్లాడుతూ.. భీమన్న గుట్ట భూములను ఇతర ప్రజా అవసరాలకు కేటాయించకుండా చర్యలు తీసుకోవాలన్నారు. భీమన్న గుట్టకు సంబంధించిన సర్వే నంబర్ 530లోని భూములన్నింటినీ కాపాడాలని డిమాండ్ చేశారు. దీంతో ఆర్డీవో రత్నకల్యాణి వారితో చర్చించి సమస్యను కలెక్టర్ దృష్టికి తీసుకెళ్లారు.

సంఘం ప్రతినిధులతో కలెక్టర్ సమావేశం

ఆందోళన విషయాన్ని ఆర్డీవో ద్వారా తెలుసుకున్న కలెక్టర్​అభిలాష అభినవ్ కలెక్టరేట్​లోని తన చాంబర్ లో నిర్మల్ ముదిరాజ్ సంఘ బృందం సభ్యులతో సమావేశం నిర్వహించారు. ఆందోళనల విషయాన్ని ఇప్పటికే ప్రభుత్వానికి తెలియజేసినట్లు చెప్పారు. ప్రభుత్వ ఆదేశాలు రాగానే, వాటిని అనుసరించి సమస్యను పరిష్కరించేలా చర్యలు తీసుకుంటామని హామీ ఇచ్చారు. ఆందోళనలు విరమించాలని కోరారు. సమావేశంలో ముదిరాజ్ సంఘ రాష్ట్ర ప్రధాన కార్యదర్శి యాటకారి సాయన్న, జిల్లా అధ్యక్షుడు గణేశ్, రాష్ట్ర ఉపాధ్యక్షులు సాయి, యువజన సంఘ అధ్యక్షుడు రాజేశ్, ప్రధాన కార్యదర్శి చరణ్, ఉపాధ్యక్షుడు అర్జున్ రాజ్ తదితరులు పాల్గొన్నారు. కలెక్టర్​హామీ ఇవ్వడంతో ముదిరాజ్​లు తమదీక్షను విరమించుకున్నారు.