భీమదేవరపల్లి, వెలుగు: ముల్కనూర్ స్వకృషి మహిళా డెయిరీ సభ్యులకు ఈ ఏడాది రూ.15.47 కోట్ల బోనస్ పంపిణీ చేయనున్నట్లు ముల్కనూర్ సొసైటీ అధ్యక్షుడు ఎ.ప్రవీణ్రెడ్డి అన్నారు. సోమవారం హనుమకొండ జిల్లా భీమదేవరపల్లి మండలం ముల్కనూర్లో స్వకృషి డెయిరీ 23వ వార్షికోత్సవాన్ని నిర్వహించారు. ముందుగా మహాసభ నివేదిక చదివి వినిపించారు. అనంతరం ప్రవీణ్రెడ్డి మాట్లాడుతూ ముల్కనూర్ స్వకృషి మహిళా డెయిరీ ప్రస్తుతం 203 గ్రామాల్లో 23వేల మంది జీవితాల్లో వెలుగులు నింపుతుండటం అభినందనీయమన్నారు. అనంతరం డెయిరీ జీఎం భాస్కర్ రెడ్డి మాట్లాడుతూ ఈ ఏడాది రూ.180 కోట్ల వ్యాపారం నిర్వహించి , రూ.19 కోట్ల మేర లాభాలు పొందినట్లు చెప్పారు.
ఈ సందర్భంగా జీలుగుల నుంచి మేడుదల సునిత, గోపాల్పూర్ 2 నుంచి గుజ్జ రమాదేవి, అక్కన్నపేట నుంచి కాశబోయిన లావణ్యను కొత్త డైరెక్టర్లుగా ఎన్నుకున్నారు. ఉత్తమ సంఘాలుగా వంగర, భీమదేవరపల్లి, ముత్తారం తండా, ఉల్లంపల్లి, ఇందిరానగర్గ్రామాలు ఎంపికయ్యాయి. ఉత్తమ సభ్యులైన అలుగు రజిత, బత్తుల వాణి, గుజ్జ అరుణ, గుజ్జేటి సరితను సన్మానించారు. కార్యక్రమంలో ఎస్బీఐ మేనేజర్ బి.నాగరాజు, కెనరా బ్యాంక్ మేనేజర్ సాయి చరణ్, పాలకవర్గ సభ్యులు డి.రజిత, రాజేశ్వరి, సులోచన, శోభారాణి, రమాదేవి, కవిత, అరుణ, సుజాత, రజిత తదితరులు పాల్గొన్నారు.
