దేశ ఆర్థిక రాజధాని ముంబైలో దారుణ ఘటన చోటు చేసుకుంది. రోడ్డుపై మ్యాన్ హోల్ ను క్లీన్ చేస్తున్న కార్మికుడిపై కారు దూసుకెళ్లింది. ఈ ఘటనలో ఆ కార్మికుడు మృతి చెందాడు. ఈ వీడియో ప్రస్తుతం సోషల్ మీడియాలో వైరల్ అయింది.
ముంబైలో జోరుగా వర్షాలు కురుస్తున్నాయి. డ్రైనేజీలు పొంగిపొర్లుతున్నాయి. దీంతో చాలాప్రాంతాల్లో డ్రైనేజీలను మున్సిపల్ కార్మికులు క్లీన్ చేస్తున్నారు. ఇందులో భాగంగా కంది వాలి ప్రాంతంలో ఓ మున్సిపల్ కార్మికుడు నడిరోడ్డుపై ఉన్న మ్యాన్ హోల్ లోకి దిగాడు. మ్యాన్ హోల్లోని చెత్తను తీసి..పైన ఉన్న మరో వ్యక్తికి అందిస్తుండగా..అతను దూరంగా పారబోస్తున్నాడు. ఈ సమయంలో మరోసారి మ్యాన్ హోల్ లో ఉన్న చెత్తను తీసేందుకు అందులోని కార్మికుడు వంగాడు. అది గమనించని కారు డ్రైవర్..అతని మీదుగా వాహనాన్ని పోనిచ్చాడు.
ఈ ప్రమాదంలో కార్మికుడు తీవ్రంగా గాయపడ్డాడు. అతన్ని బయటకు తీసిన ఇతర కార్మికులు..ఆసుపత్రికి తరలించారు. అతను చికిత్స పొందుతూ మృతి చెందాడు. కార్మికున్ని గమనించని కారు డ్రైవర్పై విమర్శలు వెల్లువెత్తాయి. మరోవైపు మరమ్మతులు చేసేప్పుడు కార్మికులు జాగ్రత్తలు తీసుకోవాలని సూచనలను కామెంట్ చేశారు. ఈ ఘటనలో కారు డ్రైవర్ తో పాటు..కారులో ప్రయాణిస్తున్న మరో వ్యక్తిని పోలీసులు అరెస్ట్ చేశారు. వారిపై పలు సెక్షన్ల కింద కేసు నమోదు చేశారు.
