ముంబయి మహానగరాన్ని వర్షాలు అతలాకుతలం చేస్తున్నాయి. 4 రోజులుగా కురుస్తున్న భారీ వర్షాలకు లోతట్టు ప్రాంతాలు జలమయమయ్యాయి. జూన్ 28 ఉదయం 8.30 నుంచి మధ్యాహ్నం 2.30 గంటల మధ్య కేవలం ఆరు గంటల్లో 74 మిల్లీమీటర్ల వర్షపాతం నమోదైనట్లు భారత వాతావరణ శాఖ వెల్లడించింది.
రానున్న రోజుల్లో ఇదే పరిస్థితి కొనసాగవచ్చని.. ముంబయికి ఎల్లో అలెర్ట్ జారీ చేసింది. భారీ నుంచి అతి భారీ వర్షాలు కొనసాగుతాయని చెప్పింది. ఉత్తర ముంబైలోని కొన్ని ప్రాంతాల్లో ఉదయం 8 నుంచి సాయంత్రం 6 గంటల మధ్య 100 మి.మీ కంటే ఎక్కువ వర్షపాతం నమోదైంది. వాతావరణ శాఖ హెచ్చరికల నేపథ్యంలో ప్రజలు అప్రమత్తంగా ఉండాలని ప్రభుత్వం సూచించింది.
