- అలైన్మెంట్ మార్పిస్తా.. లేకుంటే పరిహారం ఎక్కువ ఇప్పిస్త
- మునుగోడు ఎమ్మెల్యే కోమటిరెడ్డి రాజగోపాల్రెడ్డి కామెంట్స్
యాదాద్రి, వెలుగు : “ నేను ఎమ్మెల్యే కాకముందే ట్రిపుల్ఆర్ అలైన్మెంట్ పూర్తయింది. అప్పటి ప్రభుత్వం అన్యాయం చేసింది. పరిస్థితి చేయిదాటిపోయింది. ఇప్పుడు న్యాయం చేయడానికి సీఎంతో మాట్లాడతా.. ప్రభుత్వంతో కొట్లాడతా.. ఒక్క శాతం చాన్స్ ఉన్నా అలైన్మెంట్మార్పిస్తా..” అని మునుగోడు ఎమ్మెల్యే కోమటిరెడ్డి రాజగోపాల్ రెడ్డి అన్నారు. శుక్రవారం చౌటుప్పల్లో ట్రిపుల్ఆర్కారణంగా భూమి కోల్పోయే వారితో నిర్వహించిన మీటింగ్లో ఆయన పాల్గొన్నారు.
ముందుగా ట్రిపుల్ఆర్ అలైన్ మెంట్పై చౌటుప్పల్ ఆర్డీవో శేఖర్రెడ్డికి ఫోన్చేశారు. తను సీఎంతో మాట్లాడతానని, అప్పటివరకూ రైతులకు ఎలాంటి నోటీసులు ఇవ్వొద్దని సూచించారు. అనంతరం ఆయన మాట్లాడుతూ ట్రిపుల్ఆర్విషయంలో పరిస్థితి చేయిదాటి పోయిందన్నారు. కేంద్ర మంత్రి నితిన్గడ్కరీ తనకు మంచి మిత్రుడని, ఆయనతో మాట్లాడుతానని చెప్పారు.
అసెంబ్లీ సమావేశాల్లో సీఎంతోనూ చర్చిస్తానన్నారు. అలైన్మెంట్ మార్చేందుకు ప్రయత్నిస్తానని హామీ ఇచ్చారు. ‘ దీన్ని ఆపాలంటే పెద్ద కురుక్షేత యుద్ధమే చేయాలి.. నాతో పరిష్కారం కాకుంటే ఎవరితోనూ కాదు’ అని పేర్కొన్నారు. పనులు ప్రారంభం కానందున కోర్టుకు పోదామని, భూమిని నమ్ముకొని బతికే వాళ్లకు అన్యాయం జరగనివ్వనని ఆయన స్పష్టం చేశారు. అలైన్మెంట్ మారని పక్షంలో ఎక్కువ పరిహారం ఇప్పించేందుకు ప్రయత్నిస్తానని, తనపై నమ్మకం ఉంచాలని ఆయన రైతులను కోరారు.
