క్వాలిటీ లేని ప్రెజర్ కుకర్లు అమ్మినందుకే సీసీపీఏ ఆదేశం
న్యూఢిల్లీ: తక్కువ క్వాలిటీ ప్రెజర్ కుకర్లు అమ్మినందుకు అమెజాన్పై సెంట్రల్ కన్జూమర్ ప్రొటెక్షన్ అథారిటీ (సీసీపీఏ) రూ. లక్ష ఫైన్ విధించింది. తన ప్లాట్ఫామ్ ద్వారా అమ్మిన మొత్తం 2,265 కుకర్లను వెనక్కి పిలిపించమని కూడా అమెజాన్ను ఆదేశించింది. కొన్న వారికి ఆ డబ్బును తిరిగి చెల్లించమని సీసీపీఏ ఆదేశించినట్లు కన్జూమర్ ఎఫెయిర్స్ డిపార్ట్మెంట్ వెల్లడించింది. అమెజాన్, ఫ్లిప్కార్ట్, పేటీఎం మాల్, షాప్క్లూస్, శ్నాప్డీల్ వంటి ఇతర ఈ–కామర్స్ ప్లాట్ఫామ్స్తోపాటు, వాటిపై ప్రెజర్ కుకర్లను అమ్ముతున్న సెల్లర్లపైనా చర్యలను సీసీపీఏ తీసుకుంటోంది. కంపల్సరీగా ఉండాల్సిన క్వాలిటీ స్టాండర్డ్స్ లేకపోవడమే దీనికి కారణమని సీసీపీఏ వెల్లడించింది.
సీసీపీఏ ఇచ్చిన నోటీసుకు అమెజాన్ సమాధానం పంపించింది. ఈ సమాధానంలోనే 2,265 ప్రెజర్ కుకర్లను అమ్మినట్లు కంపెనీ వివరించింది. వాటి అమ్మకం ద్వారా అమెజాన్కు మొత్తం రూ. 6,14,825 రెవెన్యూ వచ్చింది. ఈ ప్రెజర్ కుకర్ల అమ్మకంపై తనకు సేల్స్ కమీషన్ ఫీ వచ్చినట్లు అమెజాన్ తెలిపింది. దీంతో పెనాల్టీ చెల్లించాలని సీసీపీఏ ఆదేశించడంతోపాటు, 45 రోజులలోపు కంప్లయెన్స్ రిపోర్టు పంపించమనీ కోరింది. కన్జూమర్ల ప్రొటెక్షన్ కోసం నిరంతరం కృషి చేస్తున్నట్లు చెబుతూ, ఇటీవలే ఆయుర్వేదిక్, సిద్ధ, యునాని ఔషధాలను ఆన్లైన్లో అమ్ముతున్న ఈ–కామర్స్ ప్లాట్ఫామ్స్కు గైడ్లైన్స్ జారీ చేసినట్లు సీసీపీఏ పేర్కొంది. తప్పు దారి పట్టించే అడ్వర్టైజ్మెంట్లపైనా దృష్టి పెడుతున్నట్లు వెల్లడించింది.