డిజిటల్ పేమెంట్ల భవిష్యత్తుకు మరో ముందడుగు పడుతోంది. ఇప్పటి వరకు యూపీఐ పేమెంట్స్ సేవలు సాధారణ ప్రజలతో పాటు చిన్న వ్యాపారులకు సులభతరమైన పేమెంట్స్ సౌకర్యాన్ని తీసుకురాగా. ఇకపై పెద్ద చెప్పింపుల కోసం వినియోగించే నెట్ బ్యాంకింగ్ వ్యవస్థలో కూడా కొత్త మార్పులకు అడుగులు పడుతున్నాయి. ప్రతి నెల దాదాపు 30 కోట్ల లావాదేవీలు నెట్‌బ్యాంకింగ్ ద్వారా జరుగుతున్నాయి. అందుకే ఎన్పీసీఐ భారత్ బిల్‌పే నెట్‌బ్యాంకింగ్ 2.0 సేవలను ప్రారంభించింది.
బ్యాంకింగ్ కనెక్ట్ అనే ఈ కొత్త పేమెంట్ సెటిల్మెంట్ సిస్టమ్ నెట్ బ్యాంకింగ్ చెల్లింపులను సులభతరం చేస్తుంది. దీనిని వినియోగించి వినియోగదారులు వారి బ్యాంక్ యాప్‌కు నేరుగా వెళ్లి లావాదేవీలను పూర్తి చేసుకోవచ్చు. అలాగే QR కోడ్ ద్వారా కూడా చెల్లింపు చేసే అవకాశం ఉంది. కొత్త వ్యవస్థతో దేశంలోని బ్యాంకింగ్ చెల్లింపులు మరింత సురక్షితంగా, సౌకర్యవంతంగా మారతాయని తెలుస్తోంది.
ఈ కొత్త సిస్టమ్ వెబ్‌పేజీలో ప్రత్యక్షంగా ID, పాస్‌వర్డ్ వివరాలు ఇవ్వాల్సిన అవసరం లేదు. గతంలో మాత్రం ఇది తప్పనిసరిగా ఉండేది. కానీ వినియోగదారులు తరచూ వారి లాగిన్ వివరాలను మరచిపోవడం వల్ల పేమెంట్స్ నిలిచిపోతాయి. ఈ సమస్యను పరిష్కరించడానికి NetBanking 2.0ను రూపొందించారు. ఇది మొబైల్ ఫస్ట్ పద్ధతిలో పనిచేస్తుంది. ఇందులో మూడు పేమెంట్ ఆప్షన్స్ ఉంటాయి. బ్యాంక్ యాప్ ద్వారా చెల్లింపులు చేయడం, QR కోడ్ స్కాన్ చేయడం, లేదా బ్యాంకులు మైగ్రేట్ కాకపోతే పాత వెబ్‌సైట్‌లోనూ చెల్లింపులు చేసుకోవచ్చు.
అలాగే నెట్ బ్యాంకింగ్ పేమెంట్స్ చెల్లింపుల సమయంలో సెక్యూరిటీ విషయంలో కూడా ఆర్టిఫిషియల్ ఇంటెలిజెన్స్ (AI), మిషన్ లెర్నింగ్ ఆధారిత ఫ్రాడ్ మేనేజ్మెంట్ సిస్టమ్ రూపొందించారు. వీటి ద్వారా అక్రమ లావాదేవీలను వెంటనే గుర్తించి బ్యాంకుకీ అలర్ట్ పంపుతుంది. కొత్త విధానం ఇన్సూరెన్స్ ప్రీమియం, ఫీజులు వంటి పేమెంట్స్ కోసం ఉపయోగపడుతుంది. పెద్ద పేమెంట్స్ చేసే వ్యక్తులు లేదా వ్యాపార సంస్థలకు ఇది ఎంతగానో ఉపయోగపడనుందని తెలుస్తోంది.
