నిర్మల్, వెలుగు: పోక్సో చట్టంపై ప్రతి ఒక్కరికీ అవగాహన అవసరమని నిర్మల్ కలెక్టర్ అభిలాష అభినవ్ అన్నారు. బుధవారం సాయంత్రం పట్టణంలోని ఓ ఫంక్షన్ హాల్లో విద్యాశాఖ ఆధ్వర్యంలో నిర్వహించిన అవగాహన కార్యక్రమంలో కలెక్టర్ పాల్గొన్నారు. బాలలపై జరిగే అఘాయిత్యాలను అరికట్టేందుకు పోక్సో చట్టాన్ని కఠినంగా అమలు చేయాలని, ప్రతి విద్యార్థికి స్కూల్ స్థాయిలోనే చట్టంపై అవగాహన కల్పించాలని సూచించారు.
ఎంఈఓలు మండలాల వారీగా ప్రతి స్కూల్లో ఈ చట్టంపై ప్రత్యేక కార్యక్రమాలు నిర్వహించాలన్నారు. కార్యక్రమంలో పాల్గొన్న నిపుణుడు డేవిడ్ రాజు పోక్సో చట్టం, స్కూళ్ల నిర్వహణ, వ్యక్తిత్వ వికాసం తదితర అంశాలపై టీచర్లకు అవగాహన కల్పించారు. ఈ సందర్భంగా స్టూడెంట్లు నిర్వహించిన సాంస్కృతిక కార్యక్రమాలు ఆకట్టుకున్నాయి. కార్యక్రమంలో జిల్లా ప్రధాన న్యాయమూర్తి ఎస్.శ్రీవాణి, అడిషనల్ కలెక్టర్ ఫైజాన్ అహ్మద్, డీఎల్ఎస్ఏ సెక్రటరీ రాధిక, డీఈవో రామారావు, స్కూళ్ల హెచ్ఎంలు, అధికారులు పాల్గొన్నారు.
