- జిల్లాస్థాయి క్రీడా పోటీల్లో కలెక్టర్
నిర్మల్, వెలుగు: దివ్యాంగులకు అన్ని రంగాల్లో ప్రోత్సాహం అందించాలని నిర్మల్ కలెక్టర్ అభిలాష అభినవ్ సూచించారు. అంతర్జాతీయ దివ్యాంగుల దినోత్సవాన్ని పురస్కరించుకొని శనివారం పట్టణంలోని ఎన్టీఆర్ మినీ స్టేడియంలో దివ్యాంగులకు జిల్లా స్థాయి క్రీడా పోటీలు నిర్వహించారు. కార్యక్రమంలో పాల్గొన్న కలెక్టర్ మాట్లాడుతూ.. దివ్యాంగులను ప్రోత్సహిస్తూ వారిని సమాజంలో భాగస్వామ్యం చేయాలన్నారు.
ఎంతోమంది దివ్యాంగులు పట్టుదలతో శ్రమించి వివిధ రంగాల్లో ఉన్నత శిఖరాలకు చేరారని, ఇటీవల జరిగిన అంధుల క్రికెట్ ప్రపంచ కప్ లో భారత జట్టు విజయం సాధించిందని గుర్తుచేశారు. దివ్యాంగులంతా క్రీడలను జీవితంలో భాగస్వామ్యం చేసుకోవాలన్నారు. డీఆర్ సీ సమావేశాలు నిర్వహించి, సమస్యలను తెలుసుకుంటూ, చర్యలు చేపడతామన్నారు. కలెక్టర్, అడిషనల్ కలెక్టర్ ఫైజాన్ అహ్మద్ దివ్యాంగులతో కలిసి చెస్, క్యారం బోర్డు ఆడి వారిని ఉత్సాహపరిచారు. కార్యక్రమంలో డీఈవో భోజన్న, డీవైఎస్ఓ శ్రీకాంత్ రెడ్డి, డీపీఆర్వో విష్ణువర్ధన్, సంక్షేమ శాఖ అధికారులు తదితరులు పాల్గొన్నారు.
