మెదక్, వెలుగు : కేసీఆర్ పిరికి మనిషని, ముందస్తు ఎన్నికలకు వెళ్లడని నిజామాబాద్ ఎంపీ, మెదక్ అసెంబ్లీ పాలక్ ధర్మపురి అర్వింద్అన్నారు. రాష్ట్రంలో టైంకే ఎన్నికలు జరుగుతాయన్నారు. ఒకవేళ ప్రభుత్వాన్ని రద్దు చేస్తే తమకు సంతోషమేనన్నారు. తెల్లారే రాష్ట్రంలో ప్రెసిడెంట్ రూల్ వస్తుందని, పోలీస్పవర్ ఆయన చేతుల్లో నుంచి పోతుందన్నారు. గురువారం మెదక్ లో జరిగిన బీజేపీ శక్తి కేంద్ర ఇన్చార్జిల సమావేశానికి ఎంపీ హాజరయ్యారు. అనంతరం ప్రెస్ మీట్లో మాట్లాడారు. వచ్చే ఎన్నికల్లో రాష్ట్రంలో టీఆర్ఎస్గెలిచే పరిస్థితి లేదన్నారు. బీఆర్ఎస్ పెట్టడం వల్ల తమకేం ఇబ్బంది లేదన్నారు. అంతర్జాతీయ పార్టీ, అంతరిక్ష పార్టీ పెట్టినా తమకు అభ్యంతరం లేదన్నారు.
కాంగ్రెస్ సీజనల్ పార్టీ అని, ఎన్నికలపుడే ఆ పార్టీకి ప్రజలు గుర్తుకు వస్తారన్నారు. రాష్ట్రంలో బీజేపీ బలంగా తయారైందని, పార్టీ కోసం పని చేస్తూ, పార్టీ కార్యక్రమాలు విజయవంతం చేస్తూ, ప్రజల మధ్య ఉంటున్న వారికే వచ్చే ఎన్నికల్లో బీజేపీ టికెట్లు దక్కుతాయన్నారు. పార్టీ కోసం పనిచేస్తూ ఎన్నికల్లో టికెట్ రానివారికి ప్రభుత్వ పదవుల్లో, కౌన్సిల్ లో అవకాశాలు ఉంటాయని చెప్పారు. బూత్ స్థాయి నుంచి పార్టీని పటిష్టం చేయాలని, ప్రతి ఇంటికి వెళ్లి కేంద్ర ప్రభుత్వం అమలు చేస్తున్న అభివృద్ధి, సంక్షేమ కార్యక్రమాలను, టీఆర్ఎస్ప్రభుత్వ వైఫల్యాలను వివరించాలని సూచించారు. సమావేశంలో బీజేపీ జిల్లా అధ్యక్షులు గడ్డం శ్రీనివాస్, జిల్లా ఇన్చార్జి మల్లారెడ్డి, నాయకులు తాళ్లపల్లి రాజశేఖర్, జనార్థన్రెడ్డి, విజయ్, ప్రసాద్, వీణ పాల్గొన్నారు.
