- ఎస్టీలకు రిజర్వ్ అయిన మంచిర్యాల జిల్లాలోని గూడెం, నెల్కివెంకటాపూర్
- ఓటర్లు లేకపోవడంతో దాఖలు కాని నామినేషన్లు
- నాగర్‌‌‌‌కర్నూల్‌ జిల్లాలోని నాలుగు పంచాయతీల్లోనూ సేమ్‌ సీన్‌
- ఆయా గ్రామాల్లో ఉపసర్పంచ్‌ చేతికే సర్పంచ్ పగ్గాలు
- ఎస్సీకి రిజర్వ్ అయిన మంచిర్యాల జిల్లా రాజారాం.. ఇక్కడా ఓటర్లు, నామినేషన్లు నిల్
మంచిర్యాల, వెలుగు : పంచాయతీ ఎన్నికలతో రాష్ట్రంలోని అన్ని గ్రామాల్లో సందడి నెలకొంది. ఇప్పటికే మొదటి విడత నామినేషన్లు పూర్తి కావడంతో ఆశావహులు పోటాపోటీగా నామినేషన్లు వేశారు. కానీ మంచిర్యాల జిల్లాలోని మూడు గ్రామాలు ఎన్నికలకు దూరం కాగా, నాగర్‌‌‌‌కర్నూల్‌ జిల్లాలోని మరో నాలుగు గ్రామాల్లో ఉప సర్పంచ్ చేతికే సర్పంచ్ పగ్గాలు అందనున్నాయి. ఎస్సీ, ఎస్టీ ఓటర్లే లేని ఆయా గ్రామ పంచాయతీలను ఆ వర్గాలకే రిజర్వ్ చేయడంతో ఎన్నికల్లో పోటీ చేసేందుకు అభ్యర్థులే కరువయ్యారు. కొన్నేండ్లుగా ఇదే పరిస్థితి కొనసాగుతుండడంతో ఎలక్షన్లు, పాలకవర్గం లేక అభివృద్ధి పనులు కుంటుపడుతున్నాయని గ్రామస్తులు ఆవేదన వ్యక్తం చేస్తున్నారు.
మంచిర్యాల జిల్లాలో మొదటి విడతలో రెండు..
తొలి విడత పంచాయతీ ఎన్నికల నామినేషన్ల పర్వం శనివారంతో ముగిసింది. మంచిర్యాల నియోజకవర్గంలోని హాజీపూర్, లక్సెట్టిపేట, దండేపల్లి, ఖానాపూర్‌ నియోజకవర్గంలోని జన్నారం మండలాల పరిధిలోని 90 గ్రామ పంచాయతీలు, 816 వార్డులకు ఈ నెల 27 నుంచి 29 వరకు నామినేషన్లు తీసుకున్నారు. అయితే దండేపల్లి మండలం గూడెం, నెల్కివెంకటాపూర్ పంచాయతీల్లో సర్పంచ్, వార్డు మెంబర్‌ స్థానాలకు ఒక్క నామినేషన్‌ కూడా రాలేదు. ఈ రెండు గ్రామాలను ఏజెన్సీ ఏరియాలో చేర్చడంతో సర్పంచ్, వార్డు సభ్యుల పదవులు ఆ వర్గానికే రిజర్వ్ అయ్యాయి. కానీ ఆయా గ్రామాల్లో అసలు ఎస్టీ జనాభానే లేదు. అయినా ఆ గ్రామాలు ఎస్టీలకే రిజర్వ్ కావడంతో నామినేషన్లు వేసే వారే కరువయ్యారు.
గూడెంలో 38 ఏండ్లుగా...
దండేపల్లి మండలం గూడెం గ్రామాన్ని 1987లో ఏజెన్సీ ఏరియాలో చేర్చడంతో గత 38 ఏండ్లుగా ఇక్కడ పంచాయతీ ఎన్నికలు జరగడం లేదు. గ్రామంలో 2,140 మంది ఓటర్లు ఉన్నప్పటికీ.. ఇందులో ఒక్కరు కూడా గిరిజనులు లేరు. అయినా ఏజెన్సీ గ్రామంగా గుర్తించడంతో సర్పంచ్ పదవితో పాటు సగం వార్డులు ఎస్టీలకే రిజర్వ్ చేశారు. దీంతో సర్పంచ్, వార్డు మెంబర్లుగా పోటీ చేసేందుకు అభ్యర్థులు కరువయ్యారు.
రాజారంలో ఎస్సీలు లేకున్నా...
వేమన్నపల్లి మండలం రాజారం గ్రామంలో ఎస్సీ జనాభా లేనప్పటికీ సర్పంచ్ స్థానాన్ని ఆ వర్గానికి రిజర్వ్ చేశారు. ఇక్కడ అత్యధికంగా ఎస్టీ మన్నేవార్‌, బీసీ జనాభా ఉన్నారు. 2011 జనాభా లెక్కల టైంలో మన్నెవార్‌ ఎస్టీలను మన్నెపోళ్లు (ఎస్సీ)గా నమోదు చేయడంతో సర్పంచ్‌‌‌‌తో పాటు సగం వార్డులను ఎస్సీకి కేటాయించారు. 2019లో దస్నాపూర్ పంచాయతీ నుంచి రాజారం ప్రత్యేక జీపీగా ఏర్పాటైనప్పటి నుంచి ప్రతి ఎన్నికల్లోనూ ఈ సమస్య పునరావృతం అవుతంది. రెండో విడత ఎన్నికలు జరిగే బెల్లంపల్లి నియోజకవర్గ పరిధిలో రాజారాం గ్రామం ఉంది. దీంతో ఈ సారి కూడా ఇక్కడ నామినేషన్లు దాఖలు అయ్యే అవకాశం లేదు.
నాగర్‌‌‌‌కర్నూల్‌ జిల్లాలోనూ...
నాగర్‌‌‌‌కర్నూల్‌ జిల్లా అమ్రాబాద్‌ మండలంలోని కల్ములోనిపల్లె, ప్రశాంత్‌‌‌‌నగర్‌, కుమ్మరోనిపల్లి, వంగూరోనిపల్లి గ్రామ పంచాయతీల్లో గిరిజన జనాభా లేకపోయినా సర్పంచ్, వార్డు సభ్యుల పదవులను ఎస్టీలకు రిజర్వ్ చేస్తున్నారు. ఈ కారణంగా గత ఐదేండ్లు ఈ గ్రామాల్లో సర్పంచ్‌‌‌‌ల ప్లేస్‌‌‌‌లో ఉప సర్పంచ్‌‌‌‌కే గ్రామ పాలనను నడిపించారు. ఈ సారి కూడా ఆయా గ్రామాల సర్పంచ్ పదవులను ఎస్టీలకు రిజర్వ్ చేయడంతో మళ్లీ ఉప సర్పంచ్ చేతికే గ్రామ పాలనాధికారం దక్కనుంది. ఏజెన్సీ ప్రాంతంలోని గ్రామాలను ఎస్టీలకే రిజర్వ్ చేయాలన్న కేంద్ర నిబంధనల కారణంగా ఆయా గ్రామపంచాయతీల రిజర్వేషన్లను మార్చలేమని ఆఫీసర్లు అంటున్నారు.
ఓటర్లు ఉన్నా ఎన్నికల బహిష్కరణ
మంచిర్యాల జిల్లా వందూర్‌‌‌‌గూడ గ్రామ సర్పంచ్ పదవి ఎస్టీలకు రిజర్వ్ అయింది. ఇక్కడ ఆ వర్గం ఓటర్లు ఉన్నప్పటికీ ఎవరూ కూడా పోటీకి దిగడం లేదు. వందూర్‌‌‌‌గూడ గ్రామం గతంలో నెల్కివెంకటాపూర్ గ్రామపంచాయతీ పరిధిలో ఉండేది. కొత్తపంచాయతీలను ఏర్పాటు చేసిన టైంలో వందూర్‌‌‌‌గూడను వెంకటాపూర్‌ నుంచి విడదీసి ప్రత్యేక జేపీగా ఏర్పాటు చేసి సర్పంచ్ పదవిని ఎస్టీలకు రిజర్వ్ చేశారు. ఈ గ్రామంలో గిరిజనులు ఉన్నప్పటికీ... తమ గ్రామాన్ని నెల్కివెంకటాపూర్‌‌‌‌లోనే కొనసాగించాలని డిమాండ్ చేస్తూ 2019లో ఎన్నికలను బహిష్కరించారు. అదే డిమాండ్‌‌‌‌తో ఈ సారి కూడా ఎవరూ నామినేషన్‌ వేయలేదు.
