తమిళనాడు రాజకీయాల్లో 2026 అసెంబ్లీ ఎన్నికల ఫలితాలు పెను సంచలనాన్ని సృష్టిస్తున్నాయి. ఎవరూ ఊహించని విధంగా దళపతి విజయ్ నేతృత్వంలోని TVK 110కి పైగా స్థానాల్లో ఆధిక్యంలో దూసుకుపోతూ, సొంతంగా ప్రభుత్వాన్ని ఏర్పాటు చేసే దిశగా సాగుతోంది. దశాబ్దాల ద్రవిడ రాజకీయాలకు చెక్ పెడుతూ విజయ్ సాధిస్తున్న ఈ విజయం ఇప్పుడు దేశవ్యాప్తంగా హాట్ టాపిక్ అయింది.
ఈ అసాధారణ ఫలితాలపై నార్త్ ఇండియన్ రాజకీయ విశ్లేషకులు, నెటిజన్లు భిన్నాభిప్రాయాలు వ్యక్తం చేస్తున్నారు. దక్షిణాదిలో సినిమా స్టైల్ రాజకీయాలు మరోసారి గెలిచాయి అంటూ కొందరు విమర్శిస్తుంటే, ఇది కేవలం నటులను దేవుళ్లుగా ఆరాధించడం మాత్రమే అంటూ మరికొందరు ఎద్దేవా చేస్తున్నారు. ఎంజీఆర్, జయలలిత కాలం నాటి సినిమా పిచ్చి ఇంకా తమిళ ప్రజల్లో తగ్గలేదని సోషల్ మీడియాలో పోస్ట్లు పెడుతున్నారు.
అయితే ఈ విమర్శలను TVK సపోర్టర్స్ బలంగా తిప్పికొడుతున్నారు. ఇది కేవలం సినిమా క్రేజ్తో వచ్చిన గెలుపు కాదని.. గత 50 ఏళ్లుగా ఉన్న పాలనపై ప్రజల్లో పేరుకుపోయిన అసంతృప్తికి నిదర్శనమని వారు వాదిస్తున్నారు. ముఖ్యంగా మహిళలకు నెలకు రూ. 2వేల 500 ఆర్థిక సాయం, సంపూర్ణ మద్యపాన నిషేధం వంటి విజయ్ హామీలు గ్రామీణ ఓటర్లను విపరీతంగా ఆకట్టుకున్నాయని విశ్లేషిస్తున్నారు.
►ALSO READ | తమిళనాట సంచలనం.. ఎమ్మెల్యేగా ఓడిపోయిన స్టాలిన్ !
తమిళనాడు రాజకీయ చరిత్రలో ఒక నటుడు పార్టీ పెట్టిన మొదటి ఎన్నికల్లోనే 100 సీట్లకు పైగా సాధించడం అనేది ఒక అపూర్వ ఘట్టం. నార్త్ ఇండియన్స్ దీనిని సినిమా పిచ్చిగా చూస్తున్నప్పటికీ.. తమిళ ప్రజలు మాత్రం ఒక బలమైన ప్రత్యామ్నాయ శక్తిగా విజయ్ను ఆహ్వానించారు. ఈ విజయం కేవలం కటౌట్లకు పాలాభిషేకమా లేక ప్రజలు కోరుకున్న మార్పా అనేది విజయ్ పరిపాలన సాగించే విధానాన్ని బట్టే తెలుస్తుంది. ఏది ఏమైనా.. 2026 ఎన్నికల ఫలితాలు భారత రాజకీయ యవనికపై తమిళనాడు వైపు అందరూ తలతిప్పి చూసేలా చేశాయి. ప్రస్తుతం చెన్నైలో TVK శ్రేణుల సంబరాలు మిన్నంటుతున్నాయి.
