పేటీఎం మాతృసంస్థ వన్ 97 కమ్యూనికేషన్స్ లిమిటెడ్ తన ఆఫ్‌లైన్ మర్చంట్ల చెల్లింపుల వ్యాపారాన్ని పూర్తి స్థాయి అనుబంధ సంస్థ అయిన పేటీఎం పేమెంట్స్ సర్వీసెస్ లిమిటెడ్ (PPSL)కు బదిలీ చేసింది. ఇటీవల PPSL రిజర్వ్ బ్యాంక్ ఆఫ్ ఇండియా నుంచి పేమెంట్ అగ్రిగేటర్ లైసెన్స్‌ను పొందడంతో కంపెనీ ఈ నిర్ణయం తీసుకుంది. దీనివల్ల బిజినెస్ సామర్థ్యం కూడా పెరుగుతుందని కంపెనీ చెబుతోంది.
ఈ బదిలీ 'స్లమ్ప్ సేల్' పద్ధతిలో జరిగింది. ఆస్తులు, అప్పుల బుక్ విలువ ఆధారంగా ఈ లావాదేవీని నిర్వహించారు. మార్చి 31, 2025 నాటికి ఈ వ్యాపార విభాగం బుక్ విలువ సుమారు రూ. 960 కోట్లుగా ఉంది. వన్ 97 కమ్యూనికేషన్స్ లిమిటెడ్ దీనికి బదులుగా ఒకేసారి నగదు మొత్తాన్ని అందుకుంది. దీనికి వాటాదారులు నవంబర్ 23, 2025న ఆమోదం తెలిపిన తర్వాత.. నవంబర్ 28, 2025న డీల్ ఫైనర్ అయ్యింది. ఈ బదిలీ నవంబర్ 30, 2025 అర్ధరాత్రి నుండి అమల్లోకి వస్తుంది.
పేటీఎంకు సౌండ్‌బాక్స్, పాయింట్ ఆఫ్ సేల్ మెషిన్లు, ఆన్‌లైన్ పేమెంట్ గేట్‌వే ద్వారా సుమారు 1.4 కోట్ల ఆఫ్‌లైన్ మర్చంట్లు ఉన్నారు. 2022 నవంబర్ నుంచి రిజర్వు బ్యాంక్ ఆంక్షల కారణంగా నిలిపివేయబడిన కొత్త మర్చంట్ల ఆన్‌బోర్డింగ్ ప్రక్రియను PPSL ఇప్పుడు తిరిగి ప్రారంభించగలుగుతుంది. వ్యాపార బదిలీతో పాటు, పేటీఎంకు చెందిన ఇద్దరు సీనియర్ మేనేజ్‌మెంట్ పర్సనల్ కూడా PPSLకి బదిలీ అయ్యారు.
