న్యూఢిల్లీ: మాజీ సైనికులకు వన్ ర్యాంక్ వన్ పెన్షన్(ఓఆర్ఓపీ) బకాయిల చెల్లింపులపై గతం లో తామిచ్చిన ఆదేశాలను పాటించాల్సిందేనని కేంద్రానికి సుప్రీం కోర్టు సోమవారం స్పష్టం చేసింది. విచారణ సందర్భంగా సీల్డ్ కవర్ సంప్రదాయానికి తాను వ్యతిరేకమని సీజేఐ చెప్పారు. 2019 – 2022 నాటి 28 వేల కోట్ల బకాయిలను వచ్చే ఏడాది ఫిబ్రవరి నెలాఖరులోగా చెల్లించాల్సిందేనని ఆదేశించింది. ఈ సందర్భంగా చెల్లింపుల విధివిధానాలపై కేంద్రం తరఫున అటార్నీ జనరల్(ఏజీ) సమర్పించిన సీల్డ్ కవర్ను తీసుకునేందుకు చీఫ్ జస్టిస్ డీవై చంద్రచూడ్ నిరాకరించారు.
‘‘ఈ కేసులో రహస్యం ఏముంది? మేమిచ్చిన ఆదేశాలనే అమలు చేస్తున్నారు కదా. కోర్టులలో పారదర్శకత ఉండాలి. సీల్డ్ కవర్ విధానానికి వ్యక్తిగతంగా నేను వ్యతిరేకిని. ఈ పద్ధతికి ముగింపు పలకాలని కోరుకుంటున్నా. ఎవరి జీవితానికైనా ప్రమాదం కలుగుతుందనే సందర్భంలో మాత్రం పాటించవచ్చు” అని సీజేఐ అన్నారు. దీంతో అటార్నీ జనరల్ సీల్డ్ కవర్లోని సమాచారాన్ని కోర్టుకు చదివి వినిపించారు. అనంతరం బెంచ్ తీర్పునిచ్చింది. గ్యాలెంట్రీ అవార్డు విన్నర్ల కుటుంబాలకు ఏప్రిల్ నెలాఖరులోగా ఒకేసారి, 70 ఏండ్లు దాటిని పెన్షనర్లకు జూన్ 30 లోగా చెల్లించాలంది. మిగతా వారికి వచ్చే ఏడాది ఫిబ్రవరిలోగా 3 వాయిదాల్లో చెల్లించాలని ఆదేశించింది.
