బాలీవుడ్ వెనకబాటు.. దక్షిణాది జోరు..
బెస్ట్ ఇయర్గా 2023!
వెలుగు బిజినెస్ డెస్క్ : కరోనా మహమ్మారి దెబ్బకి పడిపోయిన మన బాక్సాఫీస్ కలెక్షన్లు మళ్లీ 2022లో పుంజుకున్నాయి. కిందటేడాది మొత్తం మీద బాక్సాఫీస్ కలెక్షన్లు రూ. 10 వేల కోట్ల మార్కును దాటేశాయి. కరోనాకి ముందు 2019లో వచ్చిన బాక్సాఫీస్ కలెక్షన్లు రూ. 10,948 కోట్ల తర్వాత 2022 కలెక్షన్లు రూ. 10,637 కోట్లే ఎక్కువ. ఎక్కువగా పెద్ద హిందీ సినిమాలు రిలీజ్ కాకపోయినా ఈ కలెక్షన్లు రావడం విశేషమని గ్రూప్ఎం–ఒర్మాక్స్ మీడియా రిపోర్టు వెల్లడించింది. అంతేకాదు, కిందటేడాది జనవరి, ఫిబ్రవరి నెలల్లో దేశంలోని కొన్ని ప్రాంతాలలో థియేటర్లు కూడా మూతపడ్డాయని, కానీ, కలెక్షన్లు ఈ రేంజ్లో పుంజుకున్నాయని ఎనలిస్టులు చెబుతున్నారు.
కంటెంట్ పైప్లైన్ ప్రకారం చూస్తే 2023 ఇంతకంటే బాగుంటుందని ఒర్మాక్స్ మీడియా సీఈఓ శైలేష్ కపూర్ చెప్పారు. కరోనా మహమ్మారి వల్ల రెండేళ్ల పాటు దేశీయంగాను, హాలీవుడ్ పరంగానూ ఇబ్బందులపాలయిన సినిమా ఇండస్ట్రీ సాధారణ స్థితికి వచ్చిందని అన్నారు. హాలీవుడ్, బాలీవుడ్సినిమాలకు తోడు రీజినల్ సినిమాల కంటెంట్ పైప్లైన్ అద్భుతంగా ఉందని, దీంతో 2023 సినిమా ఇండస్ట్రీకి బెస్ట్ ఇయర్ అవుతుందని కపూర్ పేర్కొన్నారు. 2023 లో బాక్సాఫీసు కలెక్షన్లు అన్ని రికార్డులను బద్దలు కొడతాయని, రూ. 11 వేల నుంచి రూ. 12 వేల కోట్లకు చేరుకుంటాయని కపూర్ అంచనా వేస్తున్నారు. బాక్సాఫీస్ కలెక్షన్లపరంగా 2023 కచ్చితంగా ముందుంటుందని ఇంటరాక్టివ్ టెలివిజన్ (గ్రూప్ ఎం) మేనేజింగ్ డైరెక్టర్ అజయ్ మెహతా అంచనావేశారు. హిందీలోకి డబ్ చేసిన దక్షిణాది సినిమాలను ప్రేక్షకులు ఆదరించడం మంచి పరిణామమని పేర్కొన్నారు.
2022లో హిందీ ఫిల్మ్ ఇండస్ట్రీలో కొన్ని కీలక ట్రెండ్స్ గురించి జంగ్లీ పిక్చర్స్ సీఈఓ అమ్రితా పాండే ప్రస్తావించారు. థియేటర్లలో అన్ని జానర్స్ సినిమాలు బాగా ఆడటం ఒకటైతే, స్టార్ డ్రివెన్ సిస్టమ్ నుంచి కంటెంట్ డ్రివెన్ సిస్టమ్గా మారడం రెండోదని పాండే పేర్కొన్నారు. సినిమాను రిఫ్లెక్ట్ చేసేలా మాత్రమే ట్రయలర్లు ఉండాలన్నారు.హిందీలో దుమ్ములేపిన డబ్బింగ్ సినిమాలు 2022 కలెక్షన్లలో హిందీ సినిమాల (డబ్బింగ్ మూవీస్తో కలిపి) వాటా 33 శాతమైతే, తెలుగు సినిమాలు 20 శాతం, తమిళ్ సినిమాలు 16 శాతం వాటా దక్కించుకున్నాయి. సినిమాలవారీగా చూస్తే కేజీఎఫ్ చాప్టర్ 2 రూ. 970 కోట్లతో టాప్లో నిలవగా, రూ. 869 కోట్లతో ఆర్ఆర్ఆర్ రెండో ప్లేస్లో, రూ. 471 కోట్లతో అవతార్ 2 మూడో ప్లేస్లో నిలిచాయి. అయితే 2019 తో పోలిస్తే హిందీ, హాలీవుడ్ సినిమాలు అంతగా సక్సెస్కనబరచలేదని ఈ రిపోర్టు పేర్కొంది. మరోవైపు తెలుగు, కన్నడ సినిమాల నాయకత్వంలో దక్షిణాది సినిమా పరిశ్రమ మాత్రం 2019 కలెక్షన్లను దాటేసిందని వివరించింది. 2019 తో పోలిస్తే హిందీ సినిమాల కలెక్షన్లు 27 % తగ్గి రూ. 3,513 కోట్లకు పరిమితమైనట్లు వెల్లడించింది. తెలుగు బాక్సాఫీసు కలెక్షన్లు మాత్రం 53% ఎక్కువై రూ. 2,145 కోట్లకు, తమిళ్ బాక్సాఫీస్ కలెక్షన్లు 18 % పెరిగి రూ. 1,724 కోట్లకు చేరినట్లు రిపోర్టు తెలిపింది.
గ్రాస్ బాక్సాఫీస్ కలెక్షన్లు ....
2022 రూ. 10,637 కోట్లు
2019 రూ. 10,948 కోట్లు
తెలుగు సినిమాలు 20 శాతం
తమిళ్ సినిమాలు 16 శాతం
ఎక్కువ కలెక్షన్లు తెచ్చిన సినిమాలు....
కేజీఎఫ్చాప్టర్2 రూ. 970 కోట్లు
ఆర్ఆర్ఆర్ రూ. 869 కోట్లు
అవతార్2 రూ. 471 కోట్లు