వీసా లేకుండా దేశంలోకి అక్రమంగా ప్రవేశించిన పాకిస్థాన్ యువతి సీమా హైదర్ రాష్ట్రపతి ద్రౌపది ముర్ముకు క్షమాభిక్ష పిటిషన్‌ను దాఖలు చేసింది. తన నలుగురు పిల్లలతో సహా గ్రేటర్ నోయిడాలోని తన ఇండియన్ భర్త సచిన్ మీనాతో కలిసి ఉండటానికి అనుమతించాలని అభ్యర్థిస్తూ పిటిషన్ లో పేర్కొంది. ఈ కేసులో కేసులో రాష్ట్రపతి నుంచి మౌఖిక విచారణకు కూడా ఆమె కోరారు. ఈ సందర్భంగా ఆమె కేసును పోలిన ఘటనలను ఉదాహరిస్తూ.. కొన్ని కథనాలను కూడా వివరించారు. ఆమె తరపున సుప్రీంకోర్టు న్యాయవాది ఏపీ సింగ్ దాఖలు చేసిన పిటిషన్‌ను జూలై 21న రాష్ట్రపతి సచివాలయంలో స్వీకరించారు.
భారతీయ సంస్కృతి సిద్దాంతం ప్రకారం.. వసుధైవ కుటుంబం (ప్రపంచం అంతా ఒకే కుటుంబం).. కాబట్టి శ్రీమతి హైదర్ ను తన భర్త ఇంట్లో నివసించడానికి అనుమతించాలని న్యాయవాది సింగ్ ఈ సందర్భంగా వాదించారు. మీనాను వివాహం చేసుకునే ముందు ఆ మహిళ తన ఇష్టపూర్వకంగా హిందూ మతంలోకి మారిందని కూడా ఆమె పిటిషన్‌లో పేర్కొంది. " భారతదేశానికి రావడానికి వీసా పొందలేదు. కానీ నేపాల్ వీసా తీసుకొని నేపాల్‌కు వచ్చాను. అంతే కాదు ఆమె ఇస్లాం మతం నుంచి హిందూ మతంలోకి మారాను. మార్చి 13న పిటిషనర్ ఖాట్మండులోని పవిత్ర దేవాలయం భగవాన్ పశుపతి నాథ్ మందిర్‌లో హిందూ ఆచారాలు, ఆచారాల ప్రకారం సచిన్ మీనాను వివాహం చేసుకున్నాను" అని కూడా హైదర్ పిటిషన్‌లో పేర్కొంది.
2016లో భారత పౌరసత్వం పొందిన పాకిస్తానీ గాయకుడు అద్నాన్ సమీ గురించి ప్రస్తావించిన సింగ్.. "ప్రముఖ గాయకుడు అద్నాన్ సమీ భారతదేశంలో చాలా కాలం ఉండటం వల్ల ఆయన భారత పౌరసత్వం పొందారు. అదే విధంగా సీమకు భారత పౌరసత్వం ఇవ్వాలి" అని ఆయన వాదించారు. ఇతర కేసులను కూడా ఉదహరించిన ఆయన.. ప్రపంచంలోని ఇతర దేశాలకు భారత్ ద్వంద్వ పౌరసత్వం ఇవ్వనందున తాను భారతదేశంలో ఓటు వేయలేనని ప్రముఖ నటి అలియా భట్ చెప్పిన మాటలను ఈ సందర్భంగా గుర్తు చేశారు. "ప్రముఖ సూపర్ స్టార్ అక్షయ్ కుమార్‌కు కెనడా పౌరసత్వం ఉంది. అయితే అతను చాలా కాలంగా భారతదేశంలోనే నివసిస్తున్నాడు" అని సింగ్ మరింత బలంగా నొక్కి చెప్పాడు.
జూలై 4న దేశంలోకి అక్రమంగా ప్రవేశించినందుకు గానూ హైదర్‌ను స్థానిక పోలీసులు అరెస్టు చేశారు. అక్రమ వలసదారులకు ఆశ్రయం కల్పించినందుకు సచిన్ మీనాను కూడా అదుపులోకి తీసుకున్నారు. అయితే, వారిద్దరికీ జూలై 7న బెయిల్ మంజూరైంది. నోయిడాలోని రబూపురాలోని ఒక ఇంట్లో తన నలుగురు పిల్లలతో కలిసి వీరు సహజీవనం చేస్తున్నారు. ఈ వారం ప్రారంభంలో ఉత్తరప్రదేశ్ పోలీసుల యాంటీ టెర్రరిస్ట్ స్క్వాడ్ ఈ జంటను రెండు రోజుల పాటు ప్రశ్నించింది.
