ఆయిల్​పామ్​సాగు పెరిగే చాన్స్

ఆయిల్​పామ్​సాగు పెరిగే చాన్స్
  • జిల్లాలో ఏర్పాటు కానున్న పామాయిల్​ ఫ్యాక్టరీ 
  • దావోస్​లో యునీలివర్​తో సర్కారు ఎంఓయూ 
  • ప్రస్తుతం జిల్లాలో 1,726 ఎకరాల్లో తోటలు 

 కామారెడ్డి ​, వెలుగు: తెలంగాణలో పెట్టుబడులు పెట్టేందుకు ముందుకొచ్చిన యునీలివర్​ సంస్థ కామారెడ్డి జిల్లాలో పామాయిల్​ఫ్యాక్టరీ ఏర్పాటు చేయనుంది. దావోస్ ప్రపంచ ఆర్థిక సదస్సులో యునీలివర్​కంపెనీతో సీఎం రేవంత్​రెడ్డి, ఐటీ, ఇండస్ట్రీస్​ మినిస్టర్ శ్రీధర్​బాబు ఒప్పందం చేసుకున్నారు. దీంతో జిల్లాలో ఆయిల్​పామ్​ సాగు చేస్తున్న రైతుల్లో హర్షంవ్యక్తమవుతోంది. ఫ్యాక్టరీ ఏర్పటయితే స్థానికులకు ఉపాధి దొరకడంతోపాటు ఆయిల్​పామ్​ సాగు మరింత పెరగనుంది. 

 సాగు టార్గెట్​ సగమే 

జిల్లాలో వరి, మక్క, చెరకు, సోయా, పత్తి ప్రధానంగా సాగు చేస్తారు. మూడేండ్ల నుంచి అయిల్​ పామ్​ సాగును ప్రభుత్వం ప్రొత్సహిస్తుంది. సబ్సిడీలు ప్రకటించి.. అవగాహన కార్యక్రమాలు నిర్వహించింది. 2022–23లో జిల్లాలో అయిల్​ పామ్​ సాగు జరుగుతున్నా అనుకున్న టార్గెట్​చేరుకోవడంలేదు. ఏటా 1,760 ఎకరాల్లో సాగు చేయాలని సర్కారు టార్గెట్​పెట్టుకోగా సగం కూడా రీచ్​ కావడంలేదు. 

మూడేండ్లలో 5,280 ఎకరాల్లో సాగు చేయాలని భావించగా.. 1,726 ఎకరాలకే పరిమితమైంది. 2022– -23లో 800 ఎకరాలు, 2023–-24లో 610, 2024–-25లో 316 ఎకరాల్లో సాగు చేశారు. ఆయిల్​పామ్​తక్కువనీటితో సాగవుతుంది. పెద్దగా సాగునీటి వనరులు లేనందున వరికి ప్రత్యామ్నాయంగా ఈ పంట వేయాలని అధికారులు చెప్తున్నారు. డ్రిప్​ ఇరిగేషన్​కు సబ్సిడీ ఇస్తున్నారు. 

స్థానికులకు ఉపాధి 

రైతులు వరి పట్ల ఆసక్తితో ఇతర పంటల గురించి ఆలోచించడంలేదు. ప్రస్తుతం జిల్లాలో ప్రముఖ సంస్థ ఫ్యాక్టరీ ఏర్పాటుకు ముందుకురావడంతో ఆయిల్​పామ్​ సాగు పట్ల రైతుల్లో సానుకూలత వస్తుందని భావిస్తున్నారు. వ్యవసాయమే ప్రధానమైన కామారెడ్డి జిల్లాలో పెద్ద ఇండస్ట్రీస్​లేవు. వ్యవసాయ ఆధారిత పరిశ్రమలను ఏర్పాటు చేసేందుకు అవకాశాలు ఉండడంతో ప్రభుత్వం సదాశివనగర్​ మండలం లింగంపల్లి శివారులో ఫుడ్​ ప్రాసెసింగ్ జోన్​ ఏర్పాటు చేయాలని నిర్ణయించింది. 

ALSO READ : అప్లికేషన్లు ఫుల్..ఎక్కువ రేషన్​కార్డులు, ఇందిరమ్మ ఇండ్లకే ​

ఇక్కడ ఇండస్ట్రీస్ ఏర్పాటు కోసం 400 ఎకరాలను అభివృద్ధి చేశారు. ఇప్పటికే ఇక్కడ ఒక కంపెనీ యూనిట్ ఏర్పాటు పనులు ప్రారంభించింది. పామాయిల్​ ఫ్యాక్టరీని కూడా ఇక్కడే ఏర్పాటు చేసే అవకాశం ఉందని చెప్తున్నారు. దీంతో పెద్ద ఎత్తున ఉద్యోగ, ఉపాధి అవకాశాలు లభిస్తాయని స్థానికులు ఆశిస్తున్నారు.