బస్టాప్​లు లేక ఇబ్బందులు పడుతున్న శివారు ప్రాంతాల జనం

ఎల్​బీనగర్, వెలుగు: సిటీ శివార్లకు బస్సుల్లో ప్రతిరోజు వేలాది మంది ప్రయాణిస్తుంటారు. అయితే, సరిగా బస్టాప్​లు లేక శివారు ప్రాంతాల జనం ఇబ్బందులు పడుతున్నారు. కనీసం నిల్చోడానికి జాగా లేకపోవడంతో ఎండలో ఎండుతూ వానకు తడుస్తున్నారు. అభివృద్ధి పేరుతో ఫ్లై ఓవర్లు, అండర్ పాస్‌‌ల నిర్మాణాలంటూ ఎల్​బీ నగర్, నాగోల్, చింతల్​కుంట, సాగర్ రోడ్, అల్కాపురితో పాటు పలు ప్రాంతాల్లో బస్టాప్ షెల్టర్స్ తొలగించేశారు. వీటిని తొలగించి ఐదేళ్లు దాటిపోతున్నా  తిరిగి నిర్మించలేదు.

ప్రతిరోజూ తిప్పలే..

ఎస్ఆర్డీపీ (స్ట్రాటజిక్ రోడ్ డెవలప్​మెంట్ ప్రోగ్రామ్) పనుల నేపథ్యంలో నాగోల్ నుంచి ఎల్ బీనగర్ , చింతలకుంట నుంచి ఎల్ బీనగర్ వైపు, సాగర్ రింగ్ రోడ్ నుంచి ఎల్​బీ నగర్ వరకు దాదాపు 25 బస్​షెల్టర్లను బల్దియా అధికారులు తొలగించారు. కానీ తిరిగి వాటిని నిర్మించలేదు. కాగా ఆ ప్రాంతాలకు రాకపోకలు సాగించేవారు ఇబ్బంది పడుతూనే ఉన్నారు. శివారు ప్రాంతాలైన ఇబ్రహీంపట్నం, అబ్దుల్లాపూర్​మెట్, హయత్ నగర్, తుర్కయంజాల్, పెద్ద అంబర్ పేట, బాలాపూర్, బడంగ్ పేట, మీర్ పేట ప్రాంతాలకు చెందిన ఉద్యోగులు, స్టూడెంట్లు ఎల్ బీనగర్ మీదుగానే వెళ్తుంటారు. కాగా ప్రతిరోజు వీరికి తిప్పలు తప్పడం లేదు. 

విజయవాడ స్టాప్​లో కనిపించని బస్ షెల్టర్

ఏపీతో పాటు రాష్ట్రంలోని నల్గొండ, సూర్యాపేట, యాదాద్రి, ఖమ్మం జిల్లాలకు, చాలా ప్రాంతా లకు విజయవాడ బస్టాప్ ​నుంచే బస్సులు వెళ్తుంటాయి. ఆయా ప్రాంతాలకు వెళ్లే వారు చింతల్​కుంట, ఎల్ బీనగర్ మధ్య ఉన్న విజయవాడ స్టాప్​వద్ద ఎక్కుతుంటారు. రోజూ వందల బస్సులు, వేలాది మంది ప్రయాణికులు రాకపోకలు కొనసాగించే ఈ ప్రాంతంలో ఒక్క బస్టాప్ ​కూడా లేకపోవడంతో ప్రయాణికులు రోడ్డుపైనే నిల్చుంటున్నారు.  ఇక్కడి నుంచి రాకపోకలు సాగించే ప్రయాణికుల సంఖ్యను చూస్తే 10 బస్ షెల్టర్స్ పెట్టినా తక్కువేనని అభిప్రాయాలు వ్యక్తమవుతున్నాయి. జీహెచ్​ఎంసీ, ఆర్టీసీ సమన్వయ లోపంతోనే బప్టాప్​ల ఏర్పాటులో ఆలస్యం జరుగుతోందనే విమర్శలు వస్తున్నాయి.

అవసరం లేని చోట ఎందుకు?

బస్టాప్​ల వద్ద షెల్టర్స్ లేక ప్రయాణికులు ఇబ్బందిడుతున్నా జీహెచ్ఎంసీ పట్టించుకోవడం లేదు. అవసరంలేని చోట ఏర్పాటు చేస్తున్నారు. విజయవాడ బస్టాప్​ లాంటి ప్రాంతాల్లో అయితే కనీసం టాయిలెట్స్ కూడా లేకపోవడం ప్రయాణికులకు అవస్థగా మారింది. అవసరం ఉన్న ప్రతీ చోట బస్ షెల్టర్ నిర్మించాలి.     

- రఘు, డిపో మేనేజర్, హయత్ నగర్

ఐదేండ్లుగా ఇదే పరిస్థితి..

ఉద్యోగ రీత్యా నేను ప్రతిరోజు ఎల్​బీనగర్ నుంచి మాదాపూర్​కు వెళ్తాను. బస్టాప్​ల వద్ద షెల్టర్స్ లేక ఇబ్బంది పడుతున్నాం.వానాకాలంలో తడిసిపోతున్నాం. ఐదేండ్ల నుంచి ఇదే పరిస్థితి. అధికారులకు ఎన్ని ఫిర్యాదులు చేసినా ఫలితం లేదు. 

- గణేష్, ఎల్ బీనగర్