వాట్సాప్ వచ్చాక షార్ట్ మెసేజ్ సర్వీస్ (ఎస్సెమ్మెస్) లు వాడడం తక్కువైంది. కానీ, స్మార్ట్ ఫోన్ రాకముందు ఎస్సెమ్మెస్ చేయడానికి సపరేట్గా బ్యాలెన్స్ వేయించుకునేవాళ్లు కదా! ఇప్పుడు గూగుల్ మెసేజెస్ యాప్ కొత్త ఫీచర్ అందుబాటులోకి తెచ్చింది. ఆ ఫీచర్తో ఎస్సెమ్మెస్లు పంపాలనుకునేవాళ్లు ఫుల్ ఖుషీ.ఆ ఫీచర్ ఏంటంటే...
‘మిస్టర్ పర్ఫెక్ట్’ సినిమాలో ప్రభాస్, కాజల్ బర్త్డే విషెస్ చెప్పడానికి వీడియో మెసేజ్ పంపి సర్ప్రైజ్ చేసే సీన్ గుర్తుందా? ఆ సీన్లో హీరో, హీరోయిన్ పక్కన కూర్చుని మాట్లాడుతుంటాడు. టైం అర్ధరాత్రి 12 గంటలు కాగానే హీరోయిన్ ఫోన్కి మెసేజ్ వస్తుంది. తన పక్కనే ఉన్నతను ఇంత షార్ప్గా టైంకి ఎలా మెసేజ్ చేశాడా? అని ఆశ్చర్యపోతుంది. దానికి హీరో... ‘మెసేజ్ టైప్ చేసి టైం సెట్ చేస్తే, ఆ టైంకి సెండ్ అవుతుంద’ని చెప్తాడు. అచ్చం అలానే... గూగుల్ మెసేజెస్లో కూడా డేట్, టైం సెట్ చేసుకోవచ్చు.
అదెలాగంటే..
గూగుల్ మెసేజెస్ యాప్ ఓపెన్ చేయాలి. అప్పటికే ఎవరితోనైనా చాట్ చేసుంటే స్టార్ట్ చాట్ మీద ట్యాప్ చేయాలి లేదంటే కాంటాక్ట్ లిస్ట్లో నుంచి కన్వర్జేషన్ సెలక్ట్ చేయాలి. కొత్తగా కన్వర్జేషన్ స్టార్ట్ చేయాలంటే పేరు లేదా ఫోన్ నెంబర్ సెర్చ్లో టైప్ చేసి, కాంటాక్ట్ లిస్ట్లో ఒకటి సెలక్ట్ చేసుకోవాలి. కన్వర్జేషన్ బాక్స్ మీద క్లిక్ చేసి మెస్సేజ్ టైప్ చేయాలి. అది ఫలానా టైంకి వెళ్లాలి అనుకుంటే బాక్స్ పక్కన కనిపించే ప్లస్ గుర్తు క్లిక్ చేయాలి.
లేదంటే సెండ్ బటన్ని కాసేపు ఒత్తి పట్టాలి. అప్పుడు ‘షెడ్యూల్డ్ సెండ్’ అనే ఆప్షన్ కనిపిస్తుంది. అందులో డిఫాల్ట్గా కొన్ని టైమింగ్స్ కనిపిస్తాయి. అవసరాన్ని బట్టి టైం సెలక్ట్ చేసుకోవచ్చు. లిస్ట్లో లేని టైంకి ఎస్సెమ్మెస్ పంపాలంటే ‘పిక్ డేట్అండ్ టైం’ మీద క్లిక్ చేయాలి. క్యాలెండర్లో కనిపించే తేదీ, టైం సెలక్ట్ చేసి సెట్ బటన్ నొక్కాలి. అప్పుడు సెట్ చేసిన టైం, డేట్ కనిపిస్తాయి.
తర్వాత సెండ్ గుర్తు నొక్కితే ఆ మెసేజ్ అవతలి వ్యక్తి చాట్కు యాడ్ అవుతుంది. దాని పక్కన షెడ్యూల్డ్ గుర్తు కనిపిస్తుంది. అంటే సెట్ చేసిన టైంకి మెసేజ్ వెళ్తుందన్నమాట. ఏ రోజు, ఎప్పుడు అందింది అనే వివరాలు కనిపిస్తాయి.
