జూన్ 14న విజయవంతంగా పరీక్షించిన చైనా
డ్రైవర్ లేని కార్లు చూసినం. పైలట్ లేని విమానాలను చూసినం. వాటినే డ్రోన్లు అంటున్నం. ఇప్పుడు పైలట్ లేని హెలికాప్టర్ వస్తోంది. ఆ హెలికాప్టర్ను చైనా విజయవంతంగా పరీక్షించినట్టు ఆ దేశ అధికారిక పత్రిక వెల్లడించింది. రాత్రిపూట విధుల కోసం అత్యంత ప్రతికూల వాతావరణంలో ఆ హెలికాప్టర్ను పరీక్షించినట్టు పేర్కొంది. వివిధ రకాల ఆపరేషన్ల కోసం దానిని ఆర్మీలోకి తీసుకోబోతున్నట్టు తెలిపింది. హైనన్ ప్రావిన్స్లోని దక్షిణ చైనా సముద్రంపై జూన్ 14న సెకనుకు 15 మీటర్ల వేగంతో వీచిన ఎదురు గాలుల్లో ‘ఏవీ 500’ అనే పైలట్ లేని హెలికాప్టర్ను పరీక్షించామని చెప్పింది. ఎలాంటి వాతావరణంలోనైనా ఈ డ్రోన్ హెలికాప్టర్ పనిచేస్తుందని వెల్లడించింది.
పెట్రోలింగ్, నిఘా, యుద్ధం, జరిగిన నష్టాన్ని అంచనా వేయడం వంటి వాటిని దీని ద్వారా చేయొచ్చని వివరించింది. అంతేగాకుండా ఉగ్రవాద నిర్మూలనకు వాడొచ్చని చెప్పింది. అగ్ని ప్రమాదాల్లో సహాయ చర్యల కోసం వినియోగించొచ్చని తెలిపింది. విపత్తుల్లో జరిగిన నష్టాన్ని ఈ హెలికాప్టర్ ద్వారా అంచనా వేయొచ్చంది. ఏవీ 500కు ఆయుధ వెర్షన్ అయిన ఏవీ 500 డబ్ల్యూను 2018లో చైనా విజయవంతంగా పరీక్షించింది. 175 కిలోల పేలోడ్తో గంటకు 170 కిలోమీటర్ల వేగంతో అది ప్రయాణించింది.
