- 23 ఏండ్లు నిండాక రూ.10 లక్షలు.. పై చదువులకు లోన్
న్యూఢిల్లీ: కరోనాతో తల్లిదండ్రులను కోల్పోయి, అనాథలుగా మారిన పిల్లలను ఆదుకోవడానికి ‘పీఎం కేర్స్ ఫర్ చిల్డ్రన్’ స్కీమ్ను ప్రధాని నరేంద్ర మోడీ సోమవారం ప్రారంభించారు. ఈ స్కీంలో భాగంగా స్కూల్ పిల్లలకు స్కాలర్షిప్లు, పీఎం కేర్స్ ఫర్ చిల్ట్రన్ పాస్బుక్స్, ఆయుష్మాన్ భారత్లో భాగంగా ప్రధాన మంత్రి జన్ ఆరోగ్యయోజన కింద హెల్త్ కార్డులు అందజేశారు. ప్రొఫెషనల్కోర్సులు, ఉన్నత విద్య చదవాలనుకునే వారికి ఎడ్యుకేషన్ లోన్లు ఇచ్చి పీఎం కేర్స్ సాయపడుతుందని ప్రధాని మోడీ చెప్పారు. ఈ చిన్నారుల రోజువారీ అవసరాల కోసం ప్రతి నెలా రూ.4 వేలు అందిస్తామన్నారు. 18 నుంచి 23 ఏండ్ల మధ్య విద్యార్థులకు స్టైఫెండ్ అందుతుందని, 23 ఏండ్ల వయసు వచ్చిన తర్వాత రూ.10 లక్షలతో పాటు ఆయుష్మాన్ భారత్ కింద వారి ఆరోగ్యానికి భరోసా కల్పిస్తామని, హెల్ప్ లైన్ ద్వారా సైకలాజికల్గా, ఎమోషనల్గా సాయం అందిస్తామని ప్రధాని చెప్పారు. ఈ చిన్నారులకు దేశం మొత్తం అండగా ఉంటుందని, దానికి నిదర్శనమే పీఎం కేర్స్ ఫర్ చిల్డ్రన్ అని చెప్పారు. చదువు ద్వారా వాళ్ల కాళ్లపై వాళ్లు నిలబడేలా చేయడానికే పీఎం కేర్స్ ఫర్ చిల్డ్రన్ను తీసుకొచ్చామని ప్రధాని మోడీ చెప్పారు. వారికి లాడ్జింగ్, బోర్డింగ్ సదుపాయాలు అందిస్తామన్నారు. స్కాలర్షిప్లు అందించడంతో పాటు 23 ఏండ్లు వచ్చిన తర్వాత స్వయం ఉపాధిని పొందేలా రూ.10 లక్షలు అందిస్తామని, హెల్త్ ఇన్సూరెన్స్ ద్వారా ఆరోగ్యానికి రక్షణ కల్పిస్తామని చెప్పారు. కరోనా సమయంలో ఆస్పత్రుల్లో సౌలతులకు, వెంటిలేటర్ల కొనుగోలుకు, ఆక్సిజన్ ప్లాంట్ల ఏర్పాటుకు పీఎం కేర్స్ ఎంతో సహాయపడిందని అన్నారు. దీనివల్ల ఎన్నో ప్రాణాలు కాపాడగలిగామని చెప్పారు. ఈ జర్నీలో దేశ యువత కీలకపాత్ర పోషించారన్నారు.