విపరీతమైన ధ్వని పుట్టించే సైలెన్సర్ల బైకర్లపై నెల్లూరు ట్రాఫిక్ పోలీసులు ఉక్కుపాదం మోపారు. వాహనదారులు సైలెన్సర్లతో అధిక శబ్దాలు చేస్తే.. వాహనాలు సీజ్ చేసి కేసులు నమోదు చేస్తామని పోలీసులు తెలిపారు. తనిఖీల్లో భాగంగా 173 వాహనాల సైలెన్సర్లను పోలీసులు ధ్వంసం చేశారు. జిల్లా ఎస్పీ శ్రీ విజయరావు ఆదేశాల మేరకు నెల్లూరు టౌన్లో ట్రాఫిక్ పోలీసులు, సిబ్బంది కలిసి అధిక శబ్దం చేసే సైలెన్సర్లు గల వాహనాలపై స్పెషల్ డ్రైవ్ నిర్వహించారు.
ప్రజలకు, తోటి వాహనదారులకు అసౌకర్యం కలిగిస్తూ ధ్వని కాలుష్యానికి కారణమయ్యే సైలెన్సర్లు ఉన్న వాహనదారులపై పోలీసులు చర్యలు తీసుకుంటున్నారు. వాహనదారులు ఇకపై వర్జినల్ సైలెన్సర్లనే ఉపయోగించాలని ఎస్పీ విజయారావు అన్నారు. సైలెన్సర్ తీసేసి వాహనాలు నడుపుడుతున్న వారిపై కేసులు పెడతామని, వాహనాలకు ఇటువంటి సైలెన్సర్లను విక్రయించే షాపుల యజమానులు, వాటిని బిగించే మెకానిక్ లపై కూడా చర్యలు తీసుకుంటామన్నారు. ప్రతి వాహనదారుడు ట్రాఫిక్ నిబంధనలు, రోడ్డు భద్రత నియమాలను పాటించాలని పోలీసులు సూచించారు.
