న్యూఢిల్లీ: యువతిని కారుతో ఢీకొట్టి లాక్కెళ్లిన ఘటనలో పోలీసులు కీలక విషయాలు వెల్లడించారు. మృతురాలు అంజలి సింగ్పై అత్యాచారం జరగలేదని ప్రకటించారు. మౌలానా ఆజాద్ మెడికల్ కాలేజీ బోర్డ్ ఆఫ్ డాక్టర్ల టీం.. పోస్టుమార్టం పూర్తి చేసి ప్రైమరీ రిపోర్టును పోలీసులకు సబ్మిట్ చేసింది. అంజలి సింగ్ ప్రైవేట్ పార్ట్స్పై ఎలాంటి గాయాల్లేవని పోలీసులు తెలిపారు. మరిన్ని టెస్ట్ల కోసం జీన్ ప్యాంట్ ముక్కలతో పాటు బాడీ శాంపిల్స్ సేకరించి భద్రపర్చినట్టు వివరించారు. కూతురుపై అత్యాచారం జరిగిందని మృతురాలి తల్లి చేస్తున్న ఆరోపణల్లో నిజం లేదన్నారు. డెడ్బాడీ కారు కింద ఇరుక్కుపోవడంతోనే బట్టలు చినిగిపోయాయని తెలిపారు. తల, వెన్నెముక, ఎడమ తొడ ఎముక, మోకాళ్లకు గాయాలు కావడంతో అంజలి షాక్కు గురైందని, చాలా రక్తం పోవడంతో ఆమె చనిపోయిందని స్పెషల్ కమిషనర్ సాగర్ ప్రకటించారు. కాగా, భారీ పోలీసు బందోబస్తు మధ్య ఆమె అంత్యక్రియలు మంగళవారం ముగిశాయి. అంజలి అంతిమ యాత్రలో వేలాది మంది ప్రజలు పాల్గొన్నారు.
భయంతో పారిపోయా: నిధి, అంజలి ఫ్రెండ్
అంజలి సింగ్ వెంట ఆమె ఫ్రెండ్ నిధి కూడా ఉన్నట్టు పోలీసులు తాజాగా గుర్తించారు. అంజలి వచ్చిన రూట్ను పరిశీలించగా ఈ విషయం వెలుగులోకొచ్చింది. నిధిని ట్రేస్ చేసి పోలీసులు ఆమె స్టేట్మెంట్ రికార్డు చేశారు. ఆ తర్వాత కోర్టులో హాజరుపర్చారు. ‘యాక్సిడెంట్ తర్వాత భయపడ్డా. అంజలిని కాపాడాలని ప్రయత్నించినా ఫలితం లేకుండా పోయింది. అప్పటికే ఆ కారు అంజలిని ఈడ్చుకెళ్లిపోయింది. ఇదంతా చూసి భయపడ్డా. అందుకే పోలీసులకు చెప్పలేదు”అని నిధి కోర్టుకు వివరించింది.
