‘షరతులతో’ మనసు మార్చుకున్న అమెరికా
వాషింగ్టన్: చైనా చెప్పినట్టే ప్రపంచ ఆరోగ్య సంస్థ (డబ్ల్యూహెచ్వో) పనిచేస్తోందని ఆరోపించిన అమెరికా ప్రెసిడెంట్ డొనాల్డ్ ట్రంప్.. ఆ సంస్థకు పైసలివ్వడం ఆపేశారు. మళ్లీ ఇప్పుడు ఆయన మనసు మార్చుకున్నట్టు, డబ్ల్యూహెచ్వోకు మళ్లీ పైసలిచ్చేందుకు ఆయన ఓకే చెప్పినట్టు తెలుస్తోంది. దీనికి సంబంధించి వైట్హౌస్ డ్రాఫ్ట్ లెటర్ ఒకటి బయటకు లీక్ అయినట్టు సమాచారం. ఆ లెటర్ ప్రకారం కొన్ని షరతులతో డబ్ల్యూహెచ్వోకు నిధులివ్వడానికి ట్రంప్ రెడీ అయినట్టు తెలుస్తోంది. ‘‘డబ్ల్యూహెచ్వో పనితీరు ప్రస్తుతం బాగాలేకపోయినప్పటికీ, ఇంకా సంస్థకు ఓ గొప్ప శక్తి ఉన్నట్టు భావిస్తున్నా. ఆ శక్తికి తగ్గట్టు సంస్థ పని చేయాలని కోరుకుంటున్నా. ప్రత్యేకించి ఈ కరోనా టైంలో మరింత బాధ్యతగా పనిచేయాలి. అందుకే సంస్థకు మళ్లీ నిధులివ్వాలని నిర్ణయించుకున్నా. కలిసి పనిచేయాలనుకుంటున్నా. ప్రపంచానికి చైనా ఎంతో బాకీ పడింది. ఇప్పుడు కనీసం డబ్ల్యూహెచ్వోకు నిధులు మంచిగా ఇస్తే బాగుంటుంది. ఆ దేశం ఎంత ఇస్తే దానికి తగ్గట్టు మేమిచ్చే పైసలు పెంచుతాం’’ అని ట్రంప్ చెప్పినట్టు ఆ లెటర్లో ఉన్నట్టు సమాచారం.