- ఇండియాలో కామన్ రోగాల ట్రీట్మెంట్కు ఇదే కీలకం
- ధరల కంట్రోలింగ్ రెండువైపులా పదునైన కత్తిలాంటిది
- ‘బ్రూకింగ్స్ ఇండియా’ రిపోర్ట్
మన దేశంల దాదాపుగా 3 శాతం నుంచి 4 శాతం వరకూ నకిలీ, నాణ్యత లేని మందులే సరఫరా అవుతున్నాయట. గత రెండు దశాబ్దాల్లో గుండెజబ్బులు, శ్వాస సంబంధమైన సమస్యలు పెరిగాయట. డయాబెటిస్ లాంటి లైఫ్స్టైల్ వ్యాధులూ ఎక్కువైనాయట. మొత్తంగా మనదేశంల అంటురోగాలు కాని.. రోగాల ముప్పే బాగా పెరిగిందట. అయితే, ఈ రోగాలకు మంచి ట్రీట్ మెంట్ అందాలంటే.. ముందుగా వీటి మందులపై ధరల కంట్రోలింగ్ మంచిగ ఉండాలట. మందుల ధరలను కంట్రోల్ చేయడమనేది రెండంచులా పదును ఉన్న కత్తిలాంటిదని, ఈ కంట్రోలింగ్ సరిగ్గా లేకుంటే.. అటు ఇండస్ట్రీ, పెట్టుబడిదారులకు, ఇటు వినియోగదారులకూ నష్టం కలుగుతుందట. ఈ విషయాలను వాషింగ్టన్కు చెందిన నాన్ ప్రాఫిట్ పాలసీ రీసెర్చ్ సంస్థ బ్రూకింగ్స్ ఇనిస్టిట్యూట్కు అనుబంధంగా ఉన్న బ్రూకింగ్ ఇండియా ఇటీవల ఓ నివేదికలో వెల్లడించింది. దేశంలో గత రెండు దశాబ్దాల్లో మందుల ధరల నియంత్రణ ఎలా మారుతూ వచ్చిందన్న అంశంపై ఫోకస్ చేస్తూ.. ‘ఇండియాలో మందులు: అందుబాటు, సరైన ధర, నాణ్యత’ పేరుతో ఈ నివేదికను విడుదల చేశారు. బ్రూకింగ్స్ ఇండియా రీసెర్చర్లు ప్రాచీ సింగ్, షమికా రవి, డేవిడ్ దామ్ ఈ రిపోర్ట్ను తయారు చేశారు. మందుల ధరలను చాలా జాగ్రత్తగా కంట్రోల్ చేయాలన్నారు.
నివేదికలో ఇంకా ఏం చెప్పారంటే..?
1995 నుంచి 2012 మధ్యకాలంలో ‘జాతీయ అత్యవసర మందుల జాబితా’లో 74 మందులు మాత్రమే ఉండేవి. 2013 తర్వాత వీటి సంఖ్య భారీగా పెరిగింది.
- ప్రస్తుతం ఈ జాబితాలో 800 ఫార్ములేషన్లతో కూడిన 347 మందులు ఉన్నాయి.
- ఈ లిస్టులోని మందులను నిర్ణయించిన ధరల కంటే ఎక్కువకు తయారీదారులు అమ్మరాదు.
- ధరల కంట్రోలింగ్ తరచూ కొత్త మందుల తయారీకి అడ్డంకిగా మారుతోంది. దీనివల్ల ఇన్నోవేషన్స్ మరుగునపడుతున్నాయి.
- మిగతా అన్ని మందుల కంటే అత్యవసర మందులకు ధరల నియంత్రణే చాలా కీలకమైనది.
- నోటి నుంచి మొదలుకొని మొత్తం జీర్ణవ్యవస్థ, పెద్ద పేగు వరకూ, గుండె, ఊపిరితిత్తుల సంబంధమైన మూడు రకాల రోగాలకు వాడే మందులు అత్యవసర మందుల లిస్టులో ఉన్నాయి.
- భవిష్యత్తులో మందుల ధరల నియంత్రణ ఎలా ఉండాలన్నదానిపై చర్చించాల్సిన అవసరం ఉంది. ఏ మందుల ధరలను కంట్రోల్ చేయాలి? వేటిని కంట్రోల్ చేయరాదన్న దానిపై ప్రభుత్వం ప్రయారిటీలను నిర్ణయించుకోవాలి.
- దేశంలో ఫేక్, నాణ్యత లేని మందులు 3 నుంచి 4 శాతం వరకూ ఉన్నాయి.
- రాష్ట్ర స్థాయిలో తనిఖీలు, లైసెన్సుల జారీలో అవకతవకలు ప్రధాన సమస్యలుగా ఉన్నాయి.
