అధికారిక లాంఛనాలతో రాణికి వీడ్కోలు పలకనున్న బ్రిటన్  

• ఇయ్యాల క్వీన్ ఎలిజబెత్ 2 అంత్యక్రియలు
• అధికారిక లాంఛనాలతో రాణికి వీడ్కోలు పలకనున్న బ్రిటన్  
• విండ్సర్ క్యాజిల్ వద్ద తల్లిదండ్రుల సమాధుల పక్కనే ఖననం 

లండన్: బ్రిటన్ రాణి రెండో ఎలిజబెత్ అంత్యక్రియలు సోమవారం లండన్ కు సమీపంలోని బెర్క్ షైర్ కౌంటీలో ఉన్న విండ్సర్ క్యాజిల్ గ్రౌండ్ లో ప్రభుత్వ అధికారిక లాంఛనాలతో జరగనున్నాయి. క్వీన్ రెండో ఎలిజబెత్ వృద్ధాప్య సంబంధిత అనారోగ్యం కారణంగా ఈ నెల 8న 96 ఏండ్ల వయసులో కన్నుమూశారు. అప్పటి నుంచి పది రోజులుగా సంతాప దినాలు ప్రకటించిన బ్రిటన్ సర్కారు.. ప్రొటోకాల్ ప్రకారం అధికారిక కార్యక్రమాలను నిర్వహించింది. సోమవారం ఉదయం వెస్ట్ మినిస్టర్ అబే చర్చ్​లో అంతిమ సంస్కారాలు పూర్తయిన తర్వాత అక్కడికి 20 మైళ్ల దూరంలో ఉన్న విండ్సర్ క్యాజిల్ వద్ద ఉన్న సెయింట్ జార్జ్ చాపెల్ గ్రౌండ్​కు క్వీన్ పార్థివదేహంతో అంతిమయాత్ర నిర్వహించనున్నారు. వెస్ట్ మినిస్టర్ అబే వద్ద అంతిమ సంస్కారాల ముగింపు సందర్భంగా 2 నిమిషాలు మౌనం పాటించనున్నారు. అనంతరం మధ్యాహ్నం 12.15 గంటలకు క్వీన్ అంతిమయాత్ర వెస్ట్ మినిస్టర్ అబే నుంచి ప్రారంభమవుతుంది. అంతిమయాత్రలో కింగ్ చార్లెస్, రాచకుటుంబసభ్యులు పాల్గొంటారు. 

తల్లిదండ్రుల సమాధుల పక్కనే.. 

విండ్సర్ క్యాజిల్ క్వీన్​కు చాలా ఇష్టమైన ఇల్లు. ఇక్కడి గ్రౌండ్ లోనే ఆమె తల్లిదండ్రులు కింగ్ జార్జ్ 4, క్వీన్ ఎలిజబెత్, సోదరి ప్రిన్సెస్ మార్గరెట్​లను ఖననం చేశారు. ఇప్పుడు వారి సమాధుల పక్కనే క్వీన్ పార్థివదేహాన్ని ఖననం చేయనున్నారు. క్వీన్ భర్త ప్రిన్స్ ఫిలిప్​ను ఇదే ప్లేస్​లో రాయల్ వాల్ట్​లో ఖననం చేశారు. ఇప్పుడు ఆయన శవపేటికను కూడా క్వీన్ సమాధి పక్కకు చేర్చి ఖననంచేసే అవకాశాలు ఉన్నట్లు ప్రచారం జరుగుతోంది.    

ముర్ము సహా 2 వేల మంది వరల్డ్ లీడర్ల హాజరు..    

క్వీన్ అంత్యక్రియలకు రాష్ట్రపతి ముర్ము, అమెరికా ప్రెసిడెంట్ బైడెన్ సహా అనేక దేశాల అధినేతలు, ప్రతినిధులు 2 వేల మంది వరకూ హాజరుకానున్నారు.  

లాస్ట్ జర్నీ.. 804 కిలోమీటర్లు 

క్వీన్ ఎలిజబెత్ 2 స్కాట్లాండ్ లోని బల్మోరల్ క్యాజిల్ లో ఈ నెల 8న మరణించారు. అప్పటి నుంచి రాచకుటుంబ సంప్రదాయాల ప్రకారం మొదట ఎడిన్ బరోకు అక్కడి నుంచి బకింగ్ హామ్ ప్యాలెస్ కు ఆ తర్వాత వెస్ట్ మినిస్టర్ అబే చర్చ్ కు క్వీన్ పార్థివదేహాన్ని తరలించి, అధికారిక లాంఛనాలు నిర్వహించారు. చివరగా విండ్సర్ క్యాజిల్ కు చేరుకునేసరికి క్వీన్ పార్థివదేహం సుమారు 804 కి.మీ. దూరం అంతిమయాత్ర చేసినట్లు అవుతుంది. క్వీన్ ఎలిజబెత్ 2 అంతిమయాత్ర, అంత్యక్రియలను వీక్షించేందుకు దేశవ్యాప్తంగా అనేక పార్కులు, సినిమా థియేటర్ల వద్ద భారీ స్క్రీన్ లు ఏర్పాటు చేశారు. సోమవారం బ్రిటన్ అంతటా పబ్లిక్ హాలిడే ప్రకటించారు. క్వీన్ అంత్యక్రియలకు సుమారు10 లక్షల మంది హాజరుకానున్నట్లు లండన్  రవాణా శాఖ అంచనా వేసింది.