ప్రతి ఇంట్లోనూ పిల్లల మధ్య తగవులు మామూలే. కొట్టుకుంటారు... తిట్టుకుంటారు... ఒక్కమాటలో చెప్పాలంటే ఇల్లు పీకి పందిరేస్తారు. ఒక్కోసారి ఈ గొడవలే భవిష్యత్తులో వాళ్ల మధ్య ఒకరిపై మరొకరికి కోపం, ద్వేషం కలిగించడానికి కారణం కావచ్చు. అందుకే పిల్లల పెంపకం అంత సులువు కాదంటున్నారు ఎక్స్పర్ట్స్. అయితే, చీటికిమాటికీ తోడబుట్టిన వాళ్లతో గొడవపడే చిన్నారులను ఎలా సముదాయించాలి? వాళ్ల మధ్య అనుబంధాన్ని ఎలా పెంచాలి అనేవి వివరిస్తున్నారు సైకాలజిస్ట్, డాక్టర్ జాజ్మైన్ మెకాయ్. ‘మామ్ సైకాలజిస్ట్’గా పేరున్న మెకాయ్.. పిల్లల పెంపకంపై తన
ఇన్స్టాగ్రామ్ ఖాతా ద్వారా సలహాలు, సూచనలు ఇస్తుంటారు.
తాజాగా ‘తోడబుట్టిన చిన్నారుల మధ్య తగాదాలు ఎలా తీర్చాలి?’ అనే దాని గురించి తల్లిదండ్రులకు కొన్ని సజెషన్స్ ఇచ్చారు. అవి..
- సాధ్యమైనంతవరకు పిల్లల గొడవల్లో జోక్యం చేసుకోవద్దు. ఎందుకంటే వాళ్ల మధ్య తగాదాకు పెద్ద కారణాలేమీ ఉండవు. అందుకని చూసీచూడనట్లు ఉండాలి.
- పిల్లల తగవుకు ముఖ్య కారణాల్లో ఒకటి.. ఎవరో ఒకరు అభద్రత ఫీల్ కావడం. అలాంటి పిల్లల్ని గుర్తించి వారికి మేమున్నామనే భరోసా ఇవ్వాలి. ఒకరినొకరు కొట్టుకోకుండా చూడాలి.
- చిన్నారుల మధ్య తగవును జాగ్రత్తగా గమనించాలి. ఎవరో ఒకరివైపు మాట్లాడకుండా.. వాళ్ల గొడవకు అసలు కారణమేంటో తెలుసుకోవాలి. అందులో తప్పొప్పులు అర్థమయ్యేలా వివరించాలి.
- గొడవ తగ్గాక వాళ్ల మధ్య వచ్చిన సమస్య ఎలా పరిష్కరించాలో ఆ పిల్లల్లో పెద్ద వయసు వాళ్లకు నేర్పించాలి. తమ్ముడితోనో, చెల్లెలితోనో తగవును తీర్చుకోవడానికి ఎలా వ్యవహరించాలో చెప్పాలి. చిన్నవాళ్లు తమకు కావాల్సిన వాటిని పెద్దవాళ్లను అడిగి ఎలా తీసుకోవాలి? వాళ్లను ఎలా గౌరవించాలి? అనేది నేర్చుకోనివ్వాలి.