- యునెస్కో గుర్తింపు పొందిన రామప్ప వారసత్వ సంపదను కాపాడాలి
- ఎన్‍ఐటీ రిటైర్డ్ ప్రొఫెసర్‍ పాండురంగారావు
వరంగల్‍, వెలుగు : ములుగు జిల్లా వెంకటపూర్‍లో ప్రతిపాదిత సింగరేణి ఓపెన్‍కాస్ట్ మైనింగ్‍ తో యునెస్కో గుర్తింపు పొందిన రామప్ప దేవాలయానికి తీవ్ర ముప్పు పొంచి ఉందని ఎన్‍ఐటీ రిటైర్డ్ ప్రొఫెసర్‍ పాండురంగారావు తెలిపారు. బుధవారం కాకతీయ హెరిటెజ్‍ ట్రస్ట్ ప్రతినిధులు గ్రేటర్‍ వరంగల్‍ ప్రెస్‍క్లబ్‍లో ప్రెస్‍మీట్‍ నిర్వహించారు.
ఈ సందర్భంగా పాండురంగారావు మాట్లాడుతూ సింగరేణి కాలరీస్‍ లిమిటెడ్‍ వెంకటపూర్‍ గ్రామంలో ప్రతిపాదించిన 300 మీటర్ల లోతైన ఓపెన్ కాస్ట్ గనుల తవ్వకాలతో భవిష్యత్లో తప్పకుండా ప్రమాదం ఉంటుందని హెచ్చరించారు. ఈ గని రామప్ప దేవాలయానికి దిగువ ప్రవాహ దిశలో ఐదు కిలోమీటర్ల దూరంలో ఉందన్నారు. భౌగోళికంగా ఈ ప్రాంతం అస్థిరంగా ఉందని, ఉప భ్రంశాలు (ఫాల్ట్స్) పరస్పరం దాటుకుంటూ వెళ్లే జాయింట్లను కలిగి ఉందని చెప్పారు.
ఈ ప్రాంతంలో శిల పొరలు వాలుదిశ (డిప్‍ డైరెక్షన్‍) ఈశాన్యం వైపు ఉండగా, అనేక జాయింట్లు, పగుళ్లు ఉన్నట్లు పేర్కొన్నారు. ఇవి 3 టీఎంసీల నీటి సామర్థ్యం కలిగిన రామప్ప సరస్సు నీటి మట్టం..శిలా పొరల మధ్య నుంచి భూగర్భ జలాలు ప్రవహించడం ద్వారా ఓపెన్ కాస్ట్పై ప్రభావం చూపుతుందని జీఎస్ఐ నివేదికలో పేర్కొందని వివరించారు. రామప్ప దేవాలయ పునాది ఇసుక నిర్మాణం కావడం వల్ల నీటి ప్రవాలతో నష్టం ఉంటుందని చెప్పారు.
సింగరేణి సంస్థ రిపోర్ట్ ప్రకారం రామప్ప దేవాలయంపై పేలుళ్ల ఎఫెక్ట్ ప్రస్తుతానికి తక్కువగా కనిపిస్తున్నా దీర్ఘకాలంలో ప్రమాదముందన్నారు. భవిష్యత్లో సునామీ వంటి విపత్తుకు కూడా దారి తీస్తుందన్నారు. యునెస్కో గుర్తింపు పొందిన రామప్ప దేవాలయ వారసత్వ సంపదను కాపాడాల్సిన బాధ్యత వారిపై ఉందన్నారు.
