99,129 కొత్త కార్డులకూ ఈనెల నుంచి రేషన్

• ఉమ్మడి జిల్లాలో 11,28,359 కార్డులు..
• 34,16,159 మంది మెంబర్లు
•  సెప్టెంబర్​లో 21,699 టన్నుల బియ్యం

యాదాద్రి, నల్గొండ, వెలుగు : మూడు నెలల తర్వాత నేటి నుంచి మళ్లీ  బియ్యం పంపిణీ ప్రారంభమవుతోంది. జూన్​20 తర్వాత నుంచి మంజూరు చేసిన రేషన్ కార్డులకు ఈ నెలలో బియ్యం ఇస్తారు. జూన్​లోనే ఒకేసారి మూడు నెలల బియ్యం పంపిణీ చేసిన సంగతి తెలిసిందే. ఈసారి కొత్త రేషన్​ కార్డులతోపాటు కొత్తగా మెంబర్లుగా ఆడ్ అయిన వారికి కూడా బియ్యం పంపిణీ చేయనున్నారు. కొత్తగా మెంబర్లు పెరగడంతో గతంలో కంటే ఈసారి ఎక్కువగా బియ్యాన్ని ప్రభుత్వం అలాట్​మెంట్ చేసింది. 

99,129 కొత్త కార్డులకు బియ్యం..

ప్రతినెలా డైనమిక్ కీ రిజిస్ట్రర్ (డీకేఆర్) జనరేట్ చేసే సమయానికి పెరిగిన, తరిగిన కార్డులు, మెంబర్ల ప్రకారమే బియ్యం కోటా అలాట్​చేస్తారు. జనవరి 2025 వరకు ఉమ్మడి జిల్లాలో 10,06,994 కార్డులు, 29,82,579 మంది మెంబర్లు ఉన్నారు. వీరికోసం 19,070 టన్నుల బియ్యం పంపిణీ జరిగేది. ఫిబ్రవరి 2025 నుంచి రేషన్ కార్డుల లబ్ధిదారుల ఎంపిక నడుస్తోంది. మే 25 నాటికి 10,29,230 రేషన్​ కార్డులకు చేరగా, జూన్​లో వారందరికీ మూడు నెలల కోటా బియ్యం అందించారు. ఆ తర్వాత మే 25 నుంచి ఆగస్టు 20 వరకు కొత్తగా 99,129 కుటుంబాలకు కొత్త కార్డులు మంజూరు చేశారు. దీంతో ఉమ్మడి జిల్లాలో రేషన్​ కార్డుల సంఖ్య 11,28,359కు చేరింది. రేషన్​కార్డుల్లోమొత్తంగా 34,16,159 మంది మెంబర్లుగా ఉన్నారు. 

వీరందరికీ పంపిణీ చేయడానికి 21,699 టన్నుల బియ్యం అలాట్ చేశారు. సోమవారం నుంచి లబ్ధిదారులకు రేషన్​బియ్యం పంపిణీ చేయనున్నారు. కాగా ఫిబ్రవరి నుంచి ఇప్పటివరకు 1,21,365 కుటుంబాలకు కొత్త రేషన్ కార్డులు జారీ చేశారు. కొత్త కార్డులతోపాటు పాత కార్డుల్లో కొత్తగా 4,33,580 మెంబర్లను ఆడ్ చేశారు.