- 2030 నాటికి 1 ట్రిలియన్ డాలర్లకు
- దేశంలో 5.5 కోట్ల ఉద్యోగాలను ఈ రంగమే కల్పిస్తోంది
- ఎకానమీకీ చేయూత
- హౌసింగ్ సెక్రటరీ దుర్గా శంకర్ మిశ్రా
న్యూఢిల్లీ: 2030 నాటికి దేశంలోని రియల్ ఎస్టేట్ సెక్టార్ 1 ట్రిలియన్ డాలర్లకు (రూ. 7.25 లక్షల కోట్లు) చేరుతుందని హౌసింగ్ అండ్ అర్బన్ ఎఫెయిర్స్ సెక్రటరీ దుర్గా శంకర్ మిశ్రా చెప్పారు. 2019–20లో గ్రాస్డొమెస్టిక్ ప్రొడక్ట్ (జీడీపీ)లో రియల్ ఎస్టేట్ సెక్టార్ వాటా 7 శాతమని, 2030 నాటికి ఇది 10 శాతానికి చేరుతుందని అంచనా వేస్తున్నారని పేర్కొన్నారు. దేశంలో ఎక్కువగా ఉద్యోగాలు కల్పించే రంగాలలో రియల్ ఎస్టేట్ సెక్టార్ కూడా ఒకటని చెబుతూ, ఈ రంగం 11 శాతం మందికి ఉద్యోగాలు కల్పిస్తోందని మిశ్రా అన్నారు. దేశంలోని ఎనిమిది మెట్రో సిటీల హౌసింగ్ ప్రైస్ ఇండెక్స్ లాంఛ్ ప్రోగ్రామ్లో మిశ్రా పాల్గొన్నారు. ఈ ప్రోగ్రామ్ వర్చువల్ పద్ధతిలో సోమవారం జరిగింది. రియల్ ఎస్టేట్ పోర్టల్ హౌసింగ్.కామ్, ఇండియన్ స్కూల్ ఆఫ్ బిజినెస్(ఐఎస్బీ)లు రియల్ ఎస్టేట్ బాడీ నారెడ్కోతో కలిసి ఈ హౌసింగ్ ప్రైస్ ఇండెక్స్ను తెచ్చాయి. 2030 నాటికి దేశ ఎకానమీ 10 ట్రిలియన్ డాలర్లకు చేరుతుందని అంచనా వేస్తున్నామని, ఇందులో పది శాతం రియల్ ఎస్టేట్ సెక్టార్ నుంచి వస్తుందని మిశ్రా పేర్కొన్నారు. ఎంప్లాయ్మెంట్ ప్రకారం చూసినా, రియల్ ఎస్టేట్ సెక్టార్ చాలా ముఖ్యమైనదని, దేశంలోని 50 కోట్ల ఉద్యోగాలలో 5.5 కోట్ల ఉద్యోగాలను ఈ రంగమే సృష్టిస్తోందని అన్నారు. గత ఏడేళ్లలో రియల్ ఎస్టేట్ రంగంలో చాలా మార్పులు వచ్చాయని చెప్పారు. రియల్ ఎస్టేట్ (రెగ్యులేషన్ అండ్ డెవలప్మెంట్) యాక్ట్ (రెరా)అమలులోకి రావడం ఈ రంగంలో మార్పులు తెచ్చిందని పేర్కొన్నారు. వెస్ట్ బెంగాల్, నాగాలాండ్ రాష్ట్రాలలో తప్ప ఇతర అన్ని రాష్ట్రాలు, యూనియన్ టెరిటరీలలో రెరా అమలులోకి వచ్చిందన్నారు. రియల్ ఎస్టేట్ ప్రాజెక్టులలో డీల్ చేసే ప్రోపర్టీ బ్రోకర్లు చాలా మంది రెరా కింద రిజిస్టర్ చేసుకున్నట్లు మిశ్రా వెల్లడించారు. రియల్ ఎస్టేట్ సెక్టార్ ఊపందుకోవడానికి గత ఏడు సంవత్సరాలుగా బడ్జెట్లో ప్రభుత్వం చర్యలు తీసుకుంటోందన్నారు. ప్రతీ బడ్జెట్లోనూ రియల్ ఎస్టేట్ కోసం ఏదో ఒక అనౌన్స్మెంట్ ఉంటోందని చెప్పారు. రియల్ ఎస్టేట్ కొనుగోళ్లు–అమ్మకాలు స్మూత్గా సాగడానికి డిజిటల్ ప్లాట్ఫామ్స్ అవసరమని మిశ్రా అభిప్రాయపడ్డారు. డిజిటల్ ప్లాట్ఫామ్స్లో డీల్స్ ట్రాన్సపరంట్గా సాగే ఛాన్స్ ఉంటుందన్నారు. అమెజాన్ లాంటి ఒక డిజిటల్ ప్లాట్ఫామ్ను రియల్ ఎస్టేట్ కోసంతేవాల్సిందిగా క్రెడాయ్, నేరెడ్కోలకు ఆయన సూచించారు. రియల్ ఎస్టేట్ రంగంలో క్రెడాయ్, నేరెడ్కోలు రెండూ మన దేశంలోని మేజర్ అసోసియేషన్లు. హౌసింగ్ ప్రైసింగ్ ఇండెక్స్ గురించి మాట్లాడుతూ, డెవలపర్ల నుంచి డేటా తీసుకుని దానిని డేటా ఎనలిటిక్స్ ద్వారా ఎనలైజ్ చేస్తారని పేర్కొన్నారు. రియల్ ఎస్టేట్ రంగం మరింత పెరగడానికి ఈ ఇండెక్స్ సాయపడుతుందని అన్నారు. ఇండ్లు కొనేవారితోపాటు, పాలసీల రూపకల్పనలో ప్రభుత్వాలకూ ఈ ఇండెక్స్ ఉపయోగపడుతుందని మిశ్రా చెప్పారు.
హౌసింగ్ ప్రైస్ ఇండెక్స్..
ఐఎస్బీలోని శ్రీనిరాజు సెంటర్ ఫర్ ఐటీ, నెట్వర్క్డ్ ఎకానమీ (శ్రీట్నె)లతో కలిసి ఈ హౌసింగ్ ప్రైస్ ఇండెక్స్ డెవలప్ చేసినట్లు హౌసింగ్.కామ్ వెల్లడించింది. దేశంలోని ఎనిమిది ప్రధాన సిటీలలోని రియల్ ఎస్టేట్ రేట్లు ఈ ఇండెక్స్లో ఉంటాయని పేర్కొంది. ప్రతీ నెలా ఎన్ని ఇండ్లు అమ్ముడవుతున్నాయని, ఏ రేటుకు అమ్ముడవుతున్నాయనే వివరాలు ఇండెక్స్ ద్వారా తెలుస్తాయని చెప్పింది. ప్రోపర్టీ కొనుగోలులో సరయిన నిర్ణయాలు తీసుకోవడానికి బయ్యర్లకు ఇదెంతో ఉపయోగపడుతుందని వివరించింది. ఏ టైములో కొనడం కరెక్టనేది అసెస్ చేసుకోవచ్చని, ఇదే విధంగా ఏ టైములో అమ్మడం కరెక్టనేది సెల్లర్లు కూడా తెలుసుకోవచ్చని పేర్కొంది. హైదరాబాద్, అహ్మదాబాద్, బెంగళూరు, చెన్నై, ఢిల్లీ ఎన్సీఆర్, కోల్కత, ముంబై, పుణె సిటీలలోని ప్రోపర్టీల ట్రాన్సాక్షన్ వివరాలు ఇండెక్స్లో ఉంటాయని వివరించింది. కొత్త ప్రాజెక్టుల లాంఛ్ వంటి అవసరాలకు రియల్ ఎస్టేట్ డెవలపర్లకు కూడా ఇండెక్స్ ఉపయోగపడుతుంది. ఏ లొకేషన్లో ప్రాజెక్టులు బాగా అమ్ముడు పోతున్నాయో తెలుసుకోవడం డెవలపర్లకు చాలా ముఖ్యమైనదని హౌసింగ్.కామ్ పేర్కొంది.