ఐపీఎల్లో ఆటగాళ్లు, జట్లు రికార్డులు సృష్టించడం కామన్. కానీ ఐపీఎల్ 2025 సీజన్ మాత్రం వేరే. ఎందుకంటే ఈ సీజనే ఒక సరికొత్త చరిత్ర సృష్టించింది. అదేంటంటే.. ఒకే సీజన్లో అత్యధికసార్లు 200కుపైగా స్కోర్లు నమోదు కావడం. ఈ సీజన్లో ఇప్పటి వరకు 44 సార్లు 200 పరుగుల స్కోర్లు నమోదయ్యాయి. ఒకే సీజన్లో ఇన్నిసార్లు 200 రన్స్ స్కోర్లు నమోదు కావడం 18 ఏళ్ల ఐపీఎల్ చరిత్రలో ఇదే ఫస్ట్ టైమ్. గతంలో ఏ సీజన్లోనూ ఇలా జరగలేదు. ఈ సీజన్లో ఇంకా 8 మ్యాచ్‌లు జరగాల్సి ఉంది. ప్రస్తుతం జట్ల ఫామ్ చూస్తుంటే మరికొన్ని 200 ప్లస్ స్కోర్లు నమోదు కావడం పెద్దకష్టమేమి కాదు.
ఇక, జట్ల పరంగా చూస్తే.. పంజాబ్, గుజరాత్ టీములు ఈ సీజన్లో ఇప్పటి వరకు ఏడుసార్లు 200 రన్స్ చేశాయి. ఈ రెండు జట్లు ఫ్లే ఆఫ్స్కు చేరుకున్నాయి. కాబట్టి.. మరికొన్ని డబుల్ సెంచరీ మార్క్ దాటే ఛాన్స్ ఉంది. లక్నో, రాజస్థాన్ జట్లు ఇప్పటి వరకు ఆరు సార్లు 200 స్కోర్స్ చేశాయి. ఈ రెండు జట్లు ఇప్పటికే ప్లే ఆఫ్స్ నుంచి నిష్క్రమించగా.. లక్నో తన చివరి లీగ్ మ్యాచ్ ఆడాల్సి ఉంది. రాజస్థాన్ అన్ని లీగ్ మ్యాచులు ఆడేసింది.
కాగా, 2025, మార్చి 22న ప్రారంభమైన ఐపీఎల్ 18 సీజన్ చివరి దశకు చేరుకుంది. ఈ సీజన్లో మరో 8 మ్యాచులు మాత్రమే మిగిలున్నాయి. 2025 జూన్ 3న ఫైనల్ మ్యాచ్ జరగనుంది. వాస్తవానికి మే నెలలోనే ఐపీఎల్ అయిపోవాల్సి ఉంది. కానీ పాక్, భారత్ మధ్య ఉద్రిక్తత పరిస్థితుల నేపథ్యంలో 15 రోజుల పాటు ఐపీఎల్ను నిరవధిక వాయిదా వేసింది బీసీసీఐ. మళ్లీ షెడ్యూల్ సవరించడంతో ఐపీఎల్ ముగింపు ఆలస్యమైంది. గుజరాత్ టైటాన్స్, పంజాబ్ కింగ్స్, రాయల్ చాలెంజర్స్ బెంగుళూరు, ముంబై ఇండియన్స్ జట్లు ఫ్లై ఆఫ్స్కు చేరుకున్నాయి.
