న్యూఢిల్లీ: ప్రాపర్టీ ఓనర్లకు సెక్యూరిటీ డిపాజిట్లు చెల్లించకుండానే ‘రెంట్ఓకే’ యాప్ ద్వారా స్టూడెంట్లు, యంగ్ ప్రొఫెషనల్స్ ఇండ్లను అద్దెకు తీసుకోవచ్చు. ఫైనాన్షియల్ గ్యారంటీస్ కంపెనీ ఇకారో గ్యారంటీస్తో కలిసి ఈ సదుపాయాన్ని అందుబాటులోకి తెచ్చామని రెంట్ ఓకే ప్రకటించింది. ప్రాపర్టీ ఓనర్లు రెంట్ ఓకే యాప్లో తమ ప్రాపర్టీల గురించి ప్రకటనలు ఇవ్వవచ్చు. విజిట్లను షెడ్యూల్ చేయవచ్చు. కిరాయికి వచ్చే వారి కేవైసీని పూర్తి చేయవచ్చు. పోలీస్ వెరిఫికేషన్, ఆటోమేట్ రెంట్ కలెక్షన్, అకౌంటింగ్, రెంట్ అగ్రిమెంట్ వంటి సదుపాయాలూ ఉన్నాయి. దేశమంతటా తమ సేవలను అందజేస్తున్నామని ఇకారో తెలిపింది.
సెక్యూరిటీ డిపాజిట్కు బదులు రెంటల్బాండ్ ఉంటుందని, దీనిద్వారానే కొంత అద్దెను ముందుగా చెల్లించాల్సి ఉంటుందని సంస్థ సీఓఓ పంకజ్ భన్సాలీ వివరించారు. ఇండ్ల యజమానులకు తమ అద్దె ఆదాయంపై లోన్లు కూడా ఇప్పిస్తామని వెల్లడించారు. వ్యక్తులకు, ఎంట్రప్రినార్లకు, ఎంఎస్ఎంఈలకు కూడా కొల్లటేరల్, క్యాష్రూపంలో గ్యారంటీ సేవలు అందిస్తున్నామని వివరించారు. తమ యాప్లో 220 నగరాల్లోని 12 వేల ప్రాపర్టీలు ఉన్నాయని రెంట్ఓకే ప్రకటించింది.
