అమెరికాకు చెందిన ప్రముఖ ఆర్థికవేత్తలు రాబర్ట్ ఇ. హాల్, మైఖేల్ వుడ్‌ఫోర్డ్ ఈ ఏడాది అర్థశాస్త్రంలో నోబెల్ మెమోరియల్ బహుమతిని గెలుచుకున్నారు. మాక్రోఎకనామిక్ స్టెబిలైజేషన్ కు సంబంధించిన సూక్ష్మ ఆర్థిక పునాదులపై వారు చేసిన కృషికి స్టాక్‌హోమ్‌లోని రాయల్ స్వీడిష్ అకాడమీ ఆఫ్ సైన్సెస్ ఈ అవార్డును ప్రకటించింది.
రాబర్ట్ ఇ. హాల్ కాలిఫోర్నియాలోని స్టాన్‌ఫోర్డ్ విశ్వవిద్యాలయంతో, మైఖేల్ వుడ్‌ఫోర్డ్ న్యూయార్క్‌లోని కొలంబియా విశ్వవిద్యాలయంతో సంబంధం కలిగి ఉన్నారు. వీరి రీసెర్చ్ ప్రపంచవ్యాప్తంగా ఉన్న సెంట్రల్ బ్యాంకులు, ప్రభుత్వాలు ఉపయోగించే ఆర్థిక నమూనాలకు అత్యంత స్థిరమైన సైద్ధాంతిక పునాదిని అందించాయని ప్రైజ్ కమిటీ చైర్మన్ జాన్ హాస్లర్ పేర్కొన్నారు. ఇంధన సంక్షోభాలు, వినియోగదారుల ప్రవర్తనలో సడెన్ మార్పులు వంటి ఆర్థిక షాక్‌లను ఎదుర్కోవడానికి వారి సిద్ధాంతాలు ఎంతో సహాయపడతాయని కొనియాడారు.
ALSO READ : పెళ్లై 19 ఏళ్లు.. పిల్లలు కలగలేదని విడాకులు కోరిన భర్త
ఆర్థిక శాస్త్రంలో నోబెల్ బహుమతిని అధికారికంగా ఆల్ఫ్రెడ్ నోబెల్ స్మారక స్వీడన్ బ్యాంక్ బహుమతిగా పిలుస్తారు. 1968లో స్వీడన్ సెంట్రల్ బ్యాంక్ దీనిని ఏర్పాటు చేసింది. డైనమైట్ కనిపెట్టి, 5 నోబెల్ బహుమతులను స్థాపించిన ఆల్ఫ్రెడ్ నోబెల్ జ్ఞాపకార్థం ఈ పురస్కారాన్ని అందజేస్తున్నారు. ప్యూర్ నోబెల్ నిపుణులు దీనిని సాంకేతికంగా అసలు నోబెల్ బహుమతి కాదని పేర్కొన్నప్పటికీ.. ప్రతి సంవత్సరం డిసెంబర్ 10న మిగిలిన నోబెల్ బహుమతులతో పాటు దీనిని కూడా ప్రదానం చేస్తూ వస్తున్నారు.
ఈ ఏడాది విజేతలకు అందజేసే ప్రైజ్ మనీ 12 మిలియన్ల స్వీడిష్ క్రోనార్లు అంటే మన భారత కరెన్సీలో దాదాపు రూ.11కోట్ల 50 లక్షలకు సమానం. గతేడాది వ్యాపార ఆవిష్కరణలు ఆర్థిక వృద్ధిని ఎలా ప్రోత్సహిస్తాయనే అంశంపై పరిశోధన చేసిన ముగ్గురు పరిశోధకులకు ఈ పురస్కారం లభించింది.
