అంతర్జాతీయ క్రికెట్ లో రోహిత్ శర్మకి ఒక ప్రత్యేకత ఉంది. అదేంటో కాదు బౌండరీలు బాదడంలో రోహిత్ ముందే ఉంటాడు. ఇక సిక్సులు విషయంలో తనకు తానే సాటి. ఫార్మాట్ ఏదైనా రోహిత్ భారీ ఇన్నింగ్స్ ఆడితే సిక్సుల వర్షం కురవాల్సిందే. హిట్ మ్యాన్ 20,30 పరుగులు చేసినా వాటిలో కనీసం ఒకటి రెండు సిక్సులు ఉంటాయంటే అతనికి సిక్సులు బాదేయడం ఎంత ఈజీనో మనం అర్ధం చేసుకోవచ్చు. తన అంతర్జాతీయ కెరీర్ లో ఎన్నో సిక్సులు కొట్టిన రోహిత్.. ప్రస్తుతం సౌతాఫ్రికాతో జరుగుతున్న తొలి వన్డేలో సిక్సర్లతో ఆల్ టైం రికార్డ్ సృష్టించాడు.
ఆదివారం (నవంబర్ 30) రాంచీ స్టేడియంలో జరుగుతున్న ఈ మ్యాచ్ లో ఇండియా మొదట బ్యాటింగ్ చేస్తోంది. ఓపెనర్ రోహిత్ శర్మ మూడు సిక్సర్లు కొట్టడంతో వన్డేల్లో అత్యధిక సిక్సర్లు బాదిన ప్లేయర్ గా చరిత్ర సృష్టించాడు. ప్రస్తుతం రోహిత్ వన్డే కెరీర్ లో 352 సిక్సర్లున్నాయి. 351 సిక్సర్లతో పాకిస్థాన్ పవర్ హిట్టర్ షాహిద్ అఫ్రిదిని వెనక్కి నెట్టి హిట్ మ్యాన్ అగ్ర స్థానానికి చేరుకున్నాడు. ఇన్నింగ్స్ 20 ఓవర్లో సఫారీ పేసర్ మార్కో జాన్సెన్ బౌలింగ్ లో సిక్సర్ కొట్టిన రోహిత్.. అఫ్రిదిని వెనక్కి నెట్టి టాప్ కు చేరుకున్నాడు. గేల్ (331), జయసూర్య (270), ధోనీ (229) వరుసగా మూడు, నాలుగు, ఐదు స్థానాల్లో కొనసాగుతున్నారు.
ఈ మ్యాచ్ లో ఓపెనర్ గా బరిలోకి దిగిన రోహిత్ అద్భుతంగా ఆడాడు. 51 బంతుల్లోనే 57 పరుగులు చేసి రాణించాడు. హిట్ మ్యాన్ ఇన్నింగ్స్ లో ఐదు ఫోర్లు, 3 సిక్సర్లున్నాయి. ఈ మ్యాచ్ విషయానికి వస్తే మొదట బ్యాటింగ్ చేస్తున్న టీమిండియా ప్రస్తుతం 27 ఓవర్లలో మూడు వికెట్ల నష్టానికి 184 పరుగులు చేసింది. క్రీజ్ లో కోహ్లీ (85), సుందర్ (0) ఉన్నారు. జైశ్వాల్ 18 పరుగులు చేసి విఫలమయ్యాడు. రెండేళ్ల తర్వాత జట్టులోకి వచ్చిన గైక్వాడ్ 8 పరుగులే చేసి నిరాశపరిచాడు. సౌతాఫ్రికా బౌలర్లలో బర్గర్, బార్ట్ మాన్, జాన్సెన్ తలో వికెట్ తీసుకున్నారు.
