సౌతాఫ్రికాతో ప్రారంభమైన తొలి వన్డేలో టీమిండియా వికెట్ కీపర్ బ్యాటర్ రిషబ్ పంత్ కు ప్లేయింగ్ 11లో చోటు దక్కలేదు. ఆదివారం (నవంబర్ 30) రాంచీ స్టేడియంలో జరుగుతున్న ఈ మ్యాచ్ లో ఇండియా మొదట బ్యాటింగ్ చేస్తోంది. ఈ మ్యాచ్ తుది జట్టులో ఖచ్చితంగా పంత్ కు స్థానం దక్కుతుందనుకుంటే నిరాశే మిగిలింది. టాపార్డర్ లో ఆడే యువ బ్యాటర్ రుతురాజ్ గైక్వాడ్ కు నాలుగో స్థానంలో ఆడే అవకాశం లభించింది. గైక్వాడ్ కంటే ఎక్కువ అంతర్జాతీయ అనుభవం ఉన్న పంత్ ను పక్కన పెట్టడానికి కారణం లేకపోలేదు. రెండు కారణాలతో పంత్ ను ప్లేయింగ్ 11 లో ఆడించలేదని తెలుస్తోంది.
భారత జట్టులో వికెట్ కీపర్ గా కెప్టెన్ కేఎల్ రాహుల్ ఉన్నాడు. వన్డేల్లో రాహుల్ రెగ్యులర్ వికెట్ కీపర్. గత నాలుగేళ్లుగా టీమిండియాకు వన్డేల్లో వికెట్ కీపింగ్ బాధ్యతలు చేపడుతున్నాడు. రాహుల్ కెప్టెన్ కూడా కావడంతో పంత్ అవసరం లేకుండా పోయింది. పంత్ వన్డేలు ఆడక ఏడాది దాటిపోయింది. టీ20, టెస్ట్ మ్యాచ్ లు మాత్రమే రెగ్యులర్ గా ఆడుతున్నాడు. ఈ విషయం పంత్ కు ప్రతికూలంగా మారింది. మరోవైపు గైక్వాడ్ సూపర్ ఫామ్ లో ఉన్నాడు. ఇటీవలే సౌతాఫ్రికా -ఏ తో జరిగిన సిరీస్ లో గైక్వాడ్ టాప్ రన్ స్కోరర్ గా నిలిచి ప్లేయర్ ఆఫ్ ది సిరీస్ అవార్డు గెలుచుకున్నాడు.
మూడు వన్డేల సిరీస్ లో వరుసగా 17, 68*, 25 పరుగులను చేశాడు. ఈ కారణాలు పంత్ ను ప్లేయింగ్ 11 లో వెనకపడేశాయి. శ్రేయాస్ అయ్యర్ లేకపోవడంతో ప్రస్తుతం పంత్ కు నాలుగో స్థానంలో మాత్రమే ఖాళీ ఉంది. గైక్వాడ్ కు ఛాన్స్ రావడంతో పంత్ బెంచ్ కే పరిమితం కావాల్సి వచ్చింది. ఈ మ్యాచ్ విషయానికి వస్తే మొదట బ్యాటింగ్ చేస్తున్న టీమిండియా ప్రస్తుతం 20 ఓవర్లలో వికెట్ నష్టానికి 153 పరుగులు చేసింది. క్రీజ్ లో రోహిత్ శర్మ (56), కోహ్లీ (65) ఉన్నారు. జైశ్వాల్ 18 పరుగులు చేసి విఫలమయ్యాడు.
సౌతాఫ్రికా (ప్లేయింగ్ XI):
ర్యాన్ రికెల్టన్, క్వింటన్ డి కాక్(వికెట్ కీపర్ ), ఐడెన్ మార్క్రామ్(కెప్టెన్), మాథ్యూ బ్రీట్జ్కే, టోనీ డి జోర్జి, డెవాల్డ్ బ్రీవిస్, మార్కో జాన్సెన్, కార్బిన్ బాష్, ప్రెనెలన్ సుబ్రాయెన్, నాండ్రే బర్గర్, ఒట్నీల్ బార్ట్‌మన్
భారత్ (ప్లేయింగ్ XI):
రోహిత్ శర్మ, యశస్వి జైస్వాల్, విరాట్ కోహ్లీ, రుతురాజ్ గైక్వాడ్, వాషింగ్టన్ సుందర్, KL రాహుల్(కెప్టెన్), రవీంద్ర జడేజా, హర్షిత్ రాణా, కుల్దీప్ యాదవ్, అర్ష్దీప్ సింగ్, ప్రసిద్ధ్ కృష్ణ
