కోల్బెల్ట్, వెలుగు: మంచిర్యాల జిల్లా మందమర్రిలో లావుడియ సాగర్ హత్య కేసులో నలుగురు నిందితులను మందమర్రి పోలీసులు అరెస్టు చేసి రిమాండ్కు పంపారు. ఆదివారం మందమర్రి పోలీస్స్టేషన్లో మీడియా సమావేశంలో మంచిర్యాల డీసీపీ సుదీర్ రామనాథ్ కేకన్, బెల్లంపల్లి ఏసీపీ సదయ్య తెలిపిన వివరాల ప్రకారం.. కాసిపేట మండలం మామిడిగుడాకు చెందిన లౌవుడియా సాగర్(22) మందమర్రిలోని దీపక్నగర్లో ఒక వాటర్ప్లాంట్లో కొన్నాళ్లు పని చేశాడు.
కాలనీలోని ఒక యువతితో సాగర్కు పరిచయమైంది. యువతి వెంట పడొద్దని గతంలో నిందితులు బెదిరించారు. ఈ నెల12న రాత్రి 10 గంటల ప్రాంతంలో యువతి ఇంట్లో సాగర్ ఉన్నాడని నిందితులు బోగ వెంకటేశ్, అల్లంకుంట గణేశ్, బొడ్డు బాలాజీ, నూనె వెంకటేశ్ తెలుసుకుని చితకబాదారు. అనంతరం కేకే1 మైన్ ప్రాంతానికి తీసుకెళ్లి కర్రలతో కొట్టి చంపారు. అనుమానం రాకుండా సాగర్ బైక్ మీద నుంచి పడిపోయాడని మంచిర్యాల ప్రభుత్వ ఆసుపత్రిలో చేర్పించారు. అయితే కేసులో కీలకమైన మరో ఇద్దరిని తప్పించారనే ప్రచారం జరుగుతోంది. నిందితులను అరెస్టు చేసి వాళ్లు ఉపయోగించిన బైక్లు, టాటా ఎస్ ట్రాలీ, నాలుగు సెల్ఫోన్లను స్వాధీనం చేసుకున్నామన్నారు. కేసు ఛేదించి నిందితులను పట్టుకోవడానికి కృషి చేసిన సీఐ, ఎస్ఐ హెడ్ కానిస్టేబుళ్లను డీసీపీ అభినందించారు.
