ఒకప్పుడు తెలుగు ప్రేక్షకులు హాలీవుడ్ సినిమాలకే ఎక్కువగా ఆసక్తి చూపేవారు. కానీ ఇప్పుడు పరిస్థితి పూర్తిగా మారిపోయింది. కొరియన్ సినిమాలు, డ్రామాలు (K-Drama తెలుగువారిని విపరీతంగా ఆకట్టుకుంటున్నాయి. ముఖ్యంగా యువతలో K-డ్రామాల క్రేజ్ రోజురోజుకూ పెరుగుతోంది. దీంతో ప్రముఖ ఓటీటీ సంస్థ అమెజాన్ ప్రైమ్ వీడియో కీలక నిర్ణయం తీసుకుంది. ఇకపై మరిన్ని కొరియన్ సినిమాలు, వెబ్ సిరీస్లను తెలుగు డబ్బింగ్లో అందుబాటులోకి తీసుకురానున్నట్లు ప్రకటించింది.
K-డ్రామాలకు తెలుగోళ్ల క్రేజ్..
దేశంలో కొరియన్ కంటెంట్ను అత్యధికంగా వీక్షిస్తున్న వారిలో తెలుగు ప్రేక్షకులు ముందంజలో ఉన్నారని అమెజాన్ ప్రైమ్ వీడియో ఇండియా వెల్లడించింది. తెలుగు ప్రేక్షకులు ఇప్పటికే హిందీ, ఇంగ్లీష్తో పాటు ఇతర భాషల కంటెంట్ను కూడా విస్తృతంగా చూస్తుండటంతో.. K-డ్రామాలకు మంచి ఆదరణ లభిస్తోందని సంస్థ తెలిపింది. సబ్టైటిల్స్ చదవకుండా సొంత భాషలో చూసే అవకాశం కల్పిస్తే మరింత మంది ప్రేక్షకులు ఈ కంటెంట్ను ఆస్వాదిస్తారని భావిస్తోంది.
ప్రతి నెలా ఒక కొత్త K-డ్రామాతో..
ఈ నేపథ్యంలో కొరియాకు చెందిన ప్రముఖ ఎంటర్టైన్మెంట్ సంస్థ CJ ENMతో అమెజాన్ ప్రైమ్ వీడియో బహువార్షిక ఒప్పందం కుదుర్చుకుంది. ఈ భాగస్వామ్యంతో రానున్న రెండేళ్లలో 100కు పైగా కొరియన్ టైటిల్స్ భారత ప్రేక్షకులకు అందుబాటులోకి రానున్నాయి. దాదాపు ప్రతి నెలా ఒక కొత్త K-డ్రామా లేదా సినిమా విడుదల చేయాలనే లక్ష్యంతో ప్రణాళిక రూపొందించారు.
►ALSO READ | ఒకే కేఫేలో మృణాల్ ఠాకూర్ – యశస్వి జైస్వాల్.. డేటింగ్ రూమర్స్కు వైరల్ వీడియో ఆజ్యం!
ఇటీవలి కాలంలో 'Squid Game', 'Crash Landing on You', 'Queen of Tears', 'Business Proposal', 'Goblin' వంటి K-డ్రామాలు భారతదేశంలో భారీ అభిమాన వర్గాన్ని సంపాదించాయి. ఇప్పుడు తెలుగు డబ్బింగ్ అందుబాటులోకి వస్తే ఈ క్రేజ్ మరింత పెరిగే అవకాశం ఉందని డిజిటల్ ప్లాట్ ఫామ్స్ భావిస్తున్నాయి... మొత్తానికి.. కొరియన్ కథలకు తెలుగు ప్రేక్షకులు ఇస్తున్న ఆదరణను దృష్టిలో పెట్టుకుని ఓటీటీ సంస్థలు భారీగా పెట్టుబడులు పెట్టడం.. భారత డిజిటల్ ఎంటర్టైన్మెంట్ మార్కెట్లో కొత్త ట్రెండ్గా మారుతోంది.
