ప్రాజెక్టుల ఇసుకను పట్నం తరలిస్తున్నరు.. గోకారం రిజర్వాయర్ నిర్మాణం కోసం భారీగా ఇసుక నిల్వ

• మూడేండ్లుగా పర్మిట్లు లేకుండానే హైదరాబాద్​ తరలిస్తున్న మాఫియా
•  చూసీచూడనట్లు వ్యవహరిస్తున్న ఆఫీసర్లు

నాగర్​ కర్నూల్,​ వెలుగు: ఇసుక మాఫియా బరితెగించింది. నిన్నామొన్నటి వరకు వాగులను ఊడ్చేసిన బ్యాచ్​ ఇప్పుడు ఏకంగా ఇరిగేషన్  శాఖ పరిధిలోని రిజర్వాయర్ల నిర్మాణం కోసం నిల్వ చేసిన ఇసుకను పట్నం తరలిస్తున్నారు. మైనింగ్  పర్మిట్​ లేకుండా ప్రతి రోజు ఐదు పోలీస్​స్టేషన్ల ముందు నుంచి ఇసుక లారీలు, టిప్పర్లు దర్జాగా వెళ్తున్నాయి. రెవెన్యూ, ఇరిగేషన్​ అధికారులకు ఈ విషయం తెలిసినా అటు వైపు కన్నెత్తిచూడక పోవడంపై విమర్శలు వస్తున్నాయి. 

రాత్రి, పగలు తేడా లేకుండా భారీ లారీలు, టిప్పర్లు ఇసుక తరలిస్తూ ప్రమాదాలకు కారణమవుతున్నాయని బైరాపూర్​ గ్రామస్తులు ఆందోళనకు దిగడంతో గోకారం రిజర్వాయర్​ నిర్మాణానికి నిల్వ చేసిన ఇసుక హైదరాబాద్​కు తరలిస్తున్న విషయం బయటపడింది. గురువారం రాత్రి 10 లారీలు, టిప్పర్లను అడ్డుకొని జేసీబీతో సహా వెల్డండ పోలీసులకు అప్పగించారు. అయితే పోలీసులు ఇప్పటి వరకు కేసు నమోదు చేయలేదు.

పనులు పెండింగ్​లో పడడంతో..

డిండి ఎత్తిపోతల పథకంలో భాగమైన గోకారం, ఎర్రవల్లి రిజర్వాయర్, కాల్వల నిర్మాణ పనులను 2016లో ప్రారంభించారు. వీటి నిర్మాణం కోసం 2019లో ప్రభుత్వం డిండి వాగు నుంచి 3 లక్షల క్యూబిక్​ మీటర్ల ఇసుక కేటాయించింది. డిండి, చింతపల్లి వాగు నుంచి ఇసుకను తరలించిన కాంట్రాక్ట్​ ఏజెన్సీ ఇసుకను గోకారం, భైరాపూర్​ గ్రామాల మధ్య నిల్వ చేసింది. భూసేకరణ చెల్లింపులు, ముంపు గ్రామాలైన ఎర్రవల్లి, ఎర్రవల్లి తండా పునరావాసం డబ్బులు పెండింగ్​లో ఉండడంతో పనులు దక్కించుకున్న కాంట్రాక్ట్​ ఏజెన్సీ రిజర్వాయర్​ కట్​ ఆఫ్​ ట్రెంచ్​ పనులు, సేరి అప్పారెడ్డి పల్లె నుంచి అజిలాపూర్​ వరకు కెనాల్​ పనులు ప్రారంభించింది.

ఆ తరువాత భూ నిర్వాసితులకు ప్రభుత్వం పరిహారం చెల్లించకపోవడం, చేసిన పనులకు సంబంధించిన బిల్లులు పెండింగ్​లో ఉండడంతో కాంట్రాక్టర్​ పనులు నిలిపివేశారు. ఈక్రమంలో కాంగ్రెస్​ సర్కారు రైతులకు భూసేకరణ పరిహారం చెల్లించింది. ఎర్రవల్లి, ఎర్రవల్లి తండా పునరావాసానికి రూ.17కోట్లు కేటాయించింది. త్వరలో రిజర్వాయర్, కాల్వల పనులు మొదలు కావాల్సి ఉండగా,  ప్రభుత్వం కేటాయించిన రూ.3 లక్షల క్యూబిక్​ మీటర్ల ఇసుకలో దాదాపు 80శాతం వరకు తరలించడం గమనార్హం. దీంతో ఇసుక కొరత మరోసారి సమస్య అవుతుందని అంటున్నారు.

మూడేండ్లుగా అక్రమంగా తరలింపు..

2021లో గోకారం, ఎర్రవల్లి రిజర్వాయర్​ పనులు, ప్రధాన కాల్వ పనులు నిలిచిపోవడంతో గోకారం, బైరాపూర్​ మధ్య డంప్​ చేసిన ఇసుకపై కన్నేసిన మాఫియా పర్మిట్లు లేకుండానే ఇసుకను అక్రమంగా తరలించడం మొదలుపెట్టింది. ప్రభుత్వ నిర్మాణాలకు ఉపయోగించాల్సిన ఇసుకను అక్రమంగా తరలించడం నేరమని తెలిసినా, కీలక శాఖల అధికారుల సహకారంతో లారీలు, టిప్పర్లు పెట్టి మరీ హైదరాబాద్​కు తరలిస్తున్నారు.

 ఐదేండ్ల కింద పనులు నిలిచిపోవడంతో నిల్వ చేసిన ఇసుక డంపులపై చెట్లు మొలిచి అడవిలా మారింది. ప్రతి లారీ, టిప్పర్​కు ముందు ఒక కారు ఎస్కార్ట్​గా పెట్టి, ఇతర వ్యక్తులు అడ్డుకుంటే మాఫియా రంగంలోకి దిగుతోంది.16 టైర్ల లారీలో50 నుంచి 60 టన్నుల వరకు ఇసుక తరలిస్తున్నారు. ఇకనైనా ఇసుక తరలింపును అడ్డుకోవాలని పరిసర గ్రామాల ప్రజలు కోరుతున్నారు.