అమెరికాలో బాంబు తుఫాను బీభత్సం సృష్టిస్తోంది. నెల రోజుల వ్యవధిలోనే రెండోసారి వచ్చిన ఈ తుఫానుతో అమెరికా దక్షిణ డకోటా లో విద్యుత్‌ సరఫరాకు అంతరాయం కలిగింది. వాతావరణంలో ఆకస్మిక మార్పులతో తుఫాను వేగంగా బలపడుతోందని అధికారులు తెలిపారు. 2అడుగుల వరకు మంచు పేరుకుపోవడంతో రవాణాకు, ప్రయాణానికి తీవ్ర ఇబ్బందిగా ఉంది. తుఫాను కారణంగా మిన్నెసోటా, విస్కాన్సిస్‌, నెబ్రాస్కా, సౌత్ డకోటా వంటి ప్రాంతాలు మంచు ప్రమాదంలో చిక్కుకున్నాయి. గంటకు 80 కిలోమీటర్ల వేగంతో బలమైన గాలులు వీచే అవకాశం ఉందని భావిస్తున్నారు. దీంతో విమానాల రాకపోకలకు అంతరాయం ఏర్పడింది. మరికొన్ని విమానాలను నిలిపివేశారు అధికారులు. బాంబ్ తుఫాను తో ఎలాంటి ప్రాణనష్టం జరగకుండా కట్టుదిట్టమైన చర్యలు చేపడుతున్నారు.
