రాయ్పూర్: దంతెవాడలో మావోయిస్టులు జరిపిన దారుణకాండలో డ్రైవర్తో సహా పది మంది పోలీసులు చనిపోయిన విషయం తెలిసిందే. ఈ ఘటనపై పోలీసులు జరుపుతున్న విచారణలో సంచలన విషయాలు బయటపడుతున్నాయి. మావోయిస్టులు పక్కా ప్లాన్తోనే వ్యవహరించినట్లు తెలిసింది. దాదాపు 2 నెలలు లేదా అంతకంటే ముందే ఐఈడీ బాంబును అమర్చారని పోలీసులు చెబుతున్నారు. దీనికోసం రోడ్డు పక్క నుంచి సొరంగం తవ్వారని, దాదాపు 3 లేదా 4 అడుగుల లోతులో మందుపాతరను అమర్చారని వివరించారు. ప్రాథమికంగా లభించిన ఆధారాలను పరిశీలించి ఈ విషయాన్ని గుర్తించామన్నారు. ఈ పేలుడు పదార్థాన్ని ఆపరేట్ చేయడానికి అమర్చిన వైర్లను అక్కడికి దగ్గర్లోని పొదలవరకూ భూమిని తవ్వి లోపల పాతారని చెప్పారు. ఇలా తవ్వి, మట్టి కప్పిన చోట గడ్డి మొలిచిందని వివరించారు. బాంబును గుర్తించకపోవడానికి ఇది కూడా కారణమైందని తెలిపారు. కాగా, దాడికి ముందురోజు ఆ రోడ్డుపై డీ మైనింగ్ ఎక్సెర్సైజ్ జరిగిందని అధికారులు తెలిపారు. అయినా బాంబును గుర్తించలేకపోయామని చెప్పారు. బుధవారం ఉదయం జరిగిన ఎదురుకాల్పుల్లో ఇద్దరు మావోయిస్టులు గాయపడ్డారని, వారిని అదుపులోకి తీసుకుని పోలీసులు ఆరన్ పూర్ వస్తుండగా దాడి జరిగిందన్నారు. మొదటి వాహనం దాటి వెళ్లాక అలర్ట్ అయ్యారని, రెండో వాహనాన్ని పేల్చేశారని వివరించారు.
చనిపోయినోళ్లలో మాజీ మావోయిస్టులు..
దంతెవాడ పేలుడు ఘటనలో చనిపోయిన పది మంది పోలీసులలో ఐదుగురు మాజీ మావోయిస్టులేనని పోలీసు ఉన్నతాధికారులు వెల్లడించారు. రాష్ట్రంలో మావోయిస్టుల ఏరివేత విషయంలో ప్రభుత్వం కఠినంగా వ్యవహరించడం, ప్రత్యేక బలగాలతో కూంబింగ్ జరుపుతుండడంతో ఏటా చాలామంది మావోయిస్టులు లొంగిపోతున్నారని చెప్పారు. లొంగిపోయిన వారిలో కొంతమందిని డిస్ట్రిక్ రిజర్వ్ గార్డ్స్ (డీఆర్జీ)లో చేర్చుకుని శిక్షణ ఇస్తున్నట్లు తెలిపారు. శిక్షణ పూర్తయ్యాక వారిని మావోయిస్టుల ఏరివేత ఆపరేషన్లకు పంపిస్తున్నట్లు చెప్పారు. ఇలా పోలీసులుగా మారిన మాజీ మావోయిస్టులలో ఐదుగురు తాజా పేలుడులో ప్రాణాలు కోల్పోయారని అధికారులు వివరించారు.
