- అప్లై చేసుకోవడానికి వచ్చి తిరిగి వెళ్తున్న పబ్లిక్
మహబూబ్నగర్, వెలుగు : పీఎం విశ్వకర్మ స్కీంకు అప్లయ్ చేసుకునేందుకు ప్రాబ్లమ్స్ఎదురవుతున్నాయి. రోజుల తరబడి మీసేవా సెంటర్లు, సర్వీస్ సెంటర్లకు వస్తున్న ప్రజలు సర్వర్ బిజీ ఉండటం చూసి తిరిగెళ్లిపోతున్నారు. దాదాపు రెండు నెలలుగా ఇదే పరిస్థితి ఉండటంతో అప్లయ్ చేసుకునేందుకు ఎవరూ ముందకు రావడం లేదు.గతేడాది సెప్టెంబరు 17న ఈ స్కీం ద్వారా కేంద్ర ప్రభుత్వం ఐదు శాతం వడ్డీ రేటుతో రూ.లక్ష లోన్ అందించేందుకు నిర్ణయించింది. వడ్రంగి, బోటు తయారీదారులు, కమ్మరి, సుత్తె పని ముట్లు, తాళాలు చేసే వారు, గోల్డ్ స్మిత్, శిల్పి, స్టోన్ బ్రేకర్, చర్మకారులు, బార్బర్, దోబీ, టైలర్తో పాటు 18 వర్గాల వారు అప్లై చేసుకోవడానికి అవకాశం కల్పించింది.
అప్లికేషన్లు చేసుకోవడానికి ఆన్లైన్ సెంటర్లకు వెళ్తున్న వారికి సైట్ ఓపెన్ కావడం లేదు. కొన్ని సెంటర్లలో సైట్ ఓపెన్ అవుతున్నా, వివరాలన్నీ అప్లోడ్ చేశాకా సబ్మిట్ కావడం లేదు. దీనికితోడు బెనిఫీషరి వన్ టైం పాస్ వర్డ్ (ఓటీపీ) ఆన్లైన్లో ఎంట్రీ చేసే సమయంలో కూడా సర్వర్ రావడం లేదు. అప్లికేషన్లు చేయడానికి మీ సేవా సెంటర్లు, కామన్ సర్వీర్ సెంటర్లలో ఒకే సారి ఓపెన్ చేస్తుండటంతో సైట్పై ఓవర్ లోడ్ పడుతోందని నిర్వహకులు చెపుతున్నారు.
అప్లికేషన్కు వంద వసూలు
మీ సేవా సెంటర్లు, కామన్ సర్వీస్ సెంటర్లలో ఈ అప్లికేషన్లు ఫ్రీగా చేయాలి. ఒక్కో అప్లికేషన్కు సెంట్రల్ గవర్నమెంట్ ఈ సెంటర్లకు రూ.80 చొప్పున చెల్లిస్తుంది. అయితే సెంటర్ల నిర్వాహకులు మాత్రం పబ్లిక్ నుంచి ప్రతి అప్లికేషన్కు రూ.వంద చొప్పున వసూలు చేస్తున్నారు. ప్రింట్ తీయడం, స్కానర్, ఆధార్ అథెంటికేషన్, బయోమెట్రిక్ లింక్ తదిరత ఆన్లైన్ చేయాల్సి ఉంటుందని రూ.వంద సర్వీస్ చార్జ్ తీసుకుంటున్నారు.
గతంలో చేసిన పనికి పైసల్ రాలే..
కేంద్ర ప్రభుత్వం రెండేళ్ల కిందట పీఎం కుసుమ్ సర్వే చేయించింది. ఈ సర్వే చేసేందుకు కామన్ సర్వీస్ సెంటర్ నిర్వాహకులైన విలేజ్ లెవల్ ఎంటర్ ప్రెన్యూర్ (వీఎల్ఏ) సేవలు వినియోగించుకుంది. ప్రతి రోజూ వీఎల్ఏలు వారి పరిధిలోని గ్రామంలో సోలార్ సిస్టం, సోలార్ మోటార్ల వినియోగం గురించి రైతులను అవగాహన కల్పించాలి. గ్రామాల్లో బ్యానర్లు, ఫ్లెక్సీలు, బోర్డులు ఏర్పాటు చేయాలి.
ఈ సర్వే చేసినందుకు గాను కేంద్రం ఒక్కో వీఎల్ఏకు రూ.10 వేల పారితోషికం ఇచ్చేందుకు ఒప్పుకుంది. తీరా వీఎల్ఏలు సర్వే చేశాకా ఇంత వరకు ఈ పారితోషికాలు ఇవ్వలేదు. దీంతో ప్రస్తుతం విశ్వకర్మ స్కీముకు సంబంధించి ఒక్కో అప్లికేషన్కు రూ.వంద చెల్లిస్తామన్న కేంద్రం మాటలు వీఎల్ఏలు నమ్మడం లేదు. దీంతో ప్రతి అప్లికేషన్కు సర్వీస్ చార్జ్ కింద రూ.వంద తీసుకుంటున్నారు.
నాలుగు సార్లు సెంటర్కు వెళ్లి వచ్చా..
నేను ఆర్టిస్ట్ వర్క్ చేస్తుంటా. పీఎం విశ్వకర్మ స్కీంలో తక్కువ మిత్తీతో లోను వస్తుందని తెలిసి అప్లై చేసుకుందామని నెట్ సెంటర్కు వెళ్లా. సైట్ ఓపెన్ కావడం లేదని చెబుతున్నారు. ఇప్పటికే నాలుగు సార్లు సెంటర్కు వచ్చి వెళ్లా. కానీ, అప్లై చేసుకోలేకపోయాను.
రామకృష్ణ, ఆర్టిస్ట్, మిడ్జిల్
పది సార్లు తిరిగిన..
నేను దోభీ పని చేస్తుంటా. విశ్వకర్మ స్కీంలో రూ.లక్ష లోన్లు ఇస్తున్నారంటే అప్లికేషన్ పెట్టుకోవడానికి అన్ని పేపర్లు సిద్ధం చేసుకున్నరు. పది రోజుల నుంచి మీ సేవ సెంటర్కు వెళ్లి వస్తున్నా. ఎప్పుడు వెళ్లినా సర్వర్ బిజీ వస్తోంది. నెట్ సెంటర్ వాళ్లను అడిగితే సర్వర్ ప్రాబ్లం, మాకేం తెల్వదని చెబుతున్నారు.
రామస్వామి, మున్ననూరు
