గ్రేటర్ హైదరాబాద్ లో తప్పని రేషన్ తిప్పలు!..సర్వర్ డౌన్తో పరేషాన్

ఒక్కొక్కరి నుంచి ఆరుసార్లు వేలిముద్రలు
రిజిస్టర్లో రాయడం, తూకం వేయడానికి మరింత టైం
ఒక్కో లబ్ధిదారుడికి 20 నిమిషాలు
రేషన్షాపుల వద్ద భారీ క్యూ
స్పెషల్ టీమ్ పనిచేస్తుందన్న డీఎస్ఓ

హైదరాబాద్ సిటీ, వెలుగు: ప్రభుత్వం వర్షాకాలాన్ని దృష్టిలో ఉంచుకుని జూన్లో మూడు నెలలకు సరిపడా రేషన్ఒకేసారి ఇస్తుండడంతో లబ్ధిదారులు షాపుల ముందు భారీగానే క్యూ కడుతున్నారు. అయితే, సర్వర్ డౌన్కావడం, మూడు నెలల రేషన్కోసం ఒక్కొక్కరు ఆరుసార్లు వేలిముద్రలు వేయాల్సి రావడంతో ఒక్కొక్కరికి సరుకులు ఇవ్వడానికి 20 నిమిషాల వరకు టైం పడుతోంది. రిజిస్టర్లో వివరాలు రాసుకోవడం, సరుకులు తూకం వేయడం వంటి ప్రక్రియ పూర్తయ్యే సరికి ఇంకా ఆలస్యమవుతోంది.

దీంతో లబ్ధిదారులు రేషన్షాపుల ముందు గంటల తరబడి క్యూలు కట్టాల్సి వస్తున్నది. కొన్నిచోట్ల లైన్లో చివరన ఉన్నవారు తమదాకా సరుకులు వస్తాయో.. రావోనని డీలర్లతో వాదనలకు దిగుతున్నారు. మూడు నెలల సరుకులు కావడం, షాపుకు వెళ్తే ఆలస్యమయ్యే అవకాశం ఉండడంతో చాలామంది కూలీలకు, పనులకు వెళ్లకుండా రేషన్షాపుల బాట పడుతున్నారు.

ఒక్కో లబ్ధిదారుడికి మూడు నెలలకు గాను సన్న బియ్యం, చక్కెర, గోధుమలు ఇవ్వడానికి బయోమెట్రిక్లో నెలకు రెండు సార్లు చొప్పున ఆరుసార్లు వేలిముద్రలు తీసుకోవాల్సి వస్తోందని, సర్వర్డౌన్తో ఈ ప్రక్రియ మరింత ఆలస్యమవుతోందని డీలర్లు చెప్తున్నారు. సమస్యను ఉన్నతాధికారుల దృష్టికి తీసుకెళ్లినా స్పందించడం లేదంటున్నారు. డీలర్లు కూడా షాపులో ఒకరు, లేదా ఇద్దరినే పనిలో పెట్టుకుంటుండడంతో పంపిణీ ఆలస్యం అవుతోందని అంటున్నారు.

మూడు రకాల సరుకుల పంపిణీ..

జంట నగరాల్లోని 9 సర్కిళ్ల పరిధిలో 6,47,282 రేషన్కార్డులున్నాయి. వీరికి మూడు నెలలకు 45,259.677 మెట్రిక్టన్నుల బియ్యం, 9,709.230 మెట్రిక్టన్నుల గోధుమలు, 88.695 మెట్రిక్టన్నుల చెక్కర కేటాయించారు. ఒక్కొక్కరికి 6 కిలోలు అంటే మూడు నెలలకు18 కిలోల బియ్యం, అంత్యోదయ కార్డుదారులకు 35 కిలోల చొప్పున 105 కిలోల రైస్ఇస్తున్నారు. అలాగే, ఒక్కొక్కరికి 5 కిలోల చొప్పున 15 కిలోల గోధుమలు, కిలో చొప్పున 3 కిలోల చెక్కర పంపిణీ చేస్తున్నారు.

30 శాతం పూర్తి చేశాం: డీఎస్ఓ

అన్ని సర్కిళ్లలో సరుకుల పంపిణీ సందర్భంగా సర్వర్ సమస్యలు వస్తున్నట్టు డీలర్ల నుంచి ఫిర్యాదులు వస్తున్నాయని డీఎస్ఓ రమేశ్కుమార్ తెలిపారు. ఢిల్లీ నుంచి వచ్చిన టీమ్ సమస్య పరిష్కారానికి కృషి చేస్తోందన్నారు.సమస్యలు వస్తున్నా నాలుగైదు రోజుల్లోనే దాదాపు 30 శాతం అంటే 2లక్షల మంది లబ్ధిదారులకు సరుకులు పంపిణీ చేశామన్నారు. సరుకులు అందవేమోనన్న ఆందోళన అవసరం లేదన్నారు.