శ్రుతిహాసన్ అంటే కేవలం స్టార్ హీరోయిన్ మాత్రమే కాదు.. యాక్టింగ్‌‌తో పాటు మ్యూజిక్, సింగింగ్‌‌పై కూడా తనదైన ముద్ర వేసిన నటి. ఇప్పుడు ఈ టాలెంటెడ్ ఆర్టిస్ట్ మరో కొత్త ప్రయాణానికి సిద్ధమవుతున్నట్టు తెలుస్తోంది. త్వరలోనే శ్రుతిహాసన్ మెగాఫోన్ పట్టుకుని దర్శకురాలిగా తన అదృష్టాన్ని పరీక్షించుకోబోతోందట. అంతేకాదు.. తన డైరెక్షనల్ డెబ్యూను కూడా రెగ్యులర్ కమర్షియల్ కథతో కాకుండా ఓ లేడీ ఓరియెంటెడ్ థ్రిల్లర్తో ప్లాన్ చేస్తున్నట్టు కోలీవుడ్ టాక్. దీనికోసం ఆమె గత కొంతకాలంగా ఓ థ్రిల్లర్ కథపై వర్క్ చేస్తోందట.
ఈ ప్రాజెక్ట్‌‌లో తాను హీరోయిన్‌‌గా నటించకుండా, పూర్తిగా దర్శకురాలి బాధ్యతలపైనే దృష్టి పెట్టాలని నిర్ణయించుకుందట. ఈ సినిమాలో మరో కోలీవుడ్ టాప్ హీరోయిన్ ప్రధాన పాత్రలో నటించనుందని ప్రచారం జరుగుతోంది. లిమిటెడ్ బడ్జెట్‌‌లో, కంటెంట్‌‌కు ప్రాధాన్యతనిస్తూ ఈ సినిమాను ప్రయోగాత్మకంగా రూపొందించాలనుకుంటున్నట్టు తెలుస్తోంది. శ్రుతిహాసన్‌‌కు మ్యూజిక్‌‌పై కూడా మంచి ఆసక్తి ఉండటంతో తన డెబ్యూ మూవీకి దర్శకత్వంతో పాటు సంగీత బాధ్యతలను కూడా తానే తీసుకోబోతున్నట్టు ప్రచారం జరుగుతోంది. అంటే ఆమె కెరీర్‌‌‌‌లో ఇది కొత్త మలుపు అనే చెప్పొచ్చు. ఈ చిత్రంపై త్వరలోనే అధికారిక ప్రకటన వచ్చే అవకాశం ఉంది.
