దీపావళి పండుగ వస్తుందంటే ఢిల్లీ వాసులు వణికిపోతుంటుంటారు. బాణసంచా కాల్చడం వల్ల అధిక శాతం కాలుష్యం పెరిగిపోతుంటుంది. శ్వాసకోశ వ్యాధి గ్రస్తులు, చిన్న పిల్లలు, వృద్ధుల అవస్ధలు వర్ణనాతీతంగా ఉంటాయి. దీంతో గత ఏడాది మాదిరిగానే ఈ సారి కూడా టపాసులపై ఢిల్లీ ప్రభుత్వం పూర్తి నిషేధం విధించింది. బాణసంచా తయారీ, నిల్వ, అమ్మకం, కాల్చడంపై ఢిల్లీ ప్రభుత్వం నిషేధం విధించింది. బాణసంచా కొనుగోలు చేసినా, కాల్చినా రూ.200 జరిమానా, 6 నెలల పాటు జైలు శిక్ష విధిస్తామని హెచ్చరించింది. ఈ మేరకు ప్రభుత్వం ఉత్తర్వులు జారీ చేసింది.
పటాకుల అమ్మకం, నిల్వ చేస్తే రూ. 5,000 జరిమానా లేదా 3 సంవత్సరాల జైలు శిక్ష విధించవచ్చని ఢిల్లీ పర్యావరణ మంత్రి గోపాల్ రాయ్ వెల్లడించారు. సాధారణంగా దేశ రాజధాని ఢిల్లీలో వాయు కాలుష్యం మిగతా నగరాలతో పోలిస్తే అధికంగానే ఉంటుంది. ఈ క్రమంలో.. టపాసులు కాల్చడం వల్ల గాలి నాణ్యత మరింతగా తగ్గుతుందని పర్యావరణ నిపుణులు వెల్లడిస్తున్నారు. దీపావళి పండుగ అనంతరం కాలుష్యం విపరీతంగా పెరిగిపోవడంతో సుప్రీంకోర్టు 2017లో బాణసంచాపై నిషేధం విధించింది. న్యూఢిల్లీతో సహా.. చుట్టు పక్కల నగరాల్లో టపాసుల విక్రయాలను బ్యాన్ చేసింది.
