- వార్డెన్ శోభ సస్పెన్షన్
పుల్కల్, వెలుగు: సంగారెడ్డి జిల్లా చౌటకూరు మండలం బొమ్మా రెడ్డిగూడెం గిరిజన రెసిడెన్షియల్ స్కూల్ లో శుక్రవారం అన్నంలో పురుగులు వచ్చాయని విద్యార్థులు నిరసన వ్యక్తం చేశారు. హాస్టల్ ముందు మెనూ చార్ట్ పట్టుకొని ఆందోళన నిర్వహించారు. మెనూ ప్రకారం భోజనం పెట్టడంలేదని ఆవేదన వ్యక్తం చేశారు. విషయం తెలుసుకొని జిల్లా అధికారులు హాస్టల్కు వెళ్లి పరిశీలించారు. హాస్టల్లో 220 మంది స్టూడెంట్స్ ఉండగా 3 కిలోలు కందిపప్పు, రెండు కిలోల పెరుగు ప్యాకెట్లతో సరిపుచ్చుతున్నారని విద్యార్థులు అధికారులకు విన్నవించారు.
చపాతీ స్వయంగా తామే చేసుకుంటున్నట్లు చెప్పారు. అధికారులు తనిఖీకి వచ్చిన ఆ ఒక్క రోజు మాత్రమే మంచి భోజనం పెడుతున్నట్లు ఫిర్యాదు చేశారు. వాష్రూమ్లు సరిగా లేవని అసహనం వ్యక్తం చేశారు. నూతన వాష్రూమ్లు ప్రభుత్వం మంజూరు చేసిందని, త్వరలో టెండర్లు పిలిచి పనులు చేపడుతామని ట్రైబల్ వెల్పేర్అధికారి అఖిలేశ్రెడ్డి చెప్పారు. ఆయన వెంట మండల స్పెషల్ ఆఫీసర్ వసంతకుమారి, ఎంపీడీవో శంకర్ ఉన్నారు. వార్డెన్ సస్పెన్షన్ బొమ్మా రెడ్డిగూడెం గిరిజన రెసిడెన్షియల్ స్కూల్ వార్డెన్ శోభ విధుల పట్ల నిర్లక్ష్యం చేయడంతో కలెక్టర్ ప్రావీణ్య ఆదేశాల మేరకు సస్పెండ్ చేస్తూ ఉత్తర్వులు జారీ చేసినట్లు ట్రైబల్వెల్పేర్అధికారి అఖిలేశ్రెడ్డి తెలిపారు.
